Hákon Þór hvarf spor­laust í Búda­pest

Síðast sást til Hákons um klukkan 20 að kvöldi sunnudagsins 12. apríl þegar hann yfirgaf flugvöllinn í Búdapest og steig inn í strætisvagn, að sögn aðstandenda.

„Þetta eru bara búið að vera svefnlausar nætur og mikill kvíði,“ segir Aron Freyr, tvítugur sonur Hákons, í samtali við Vísi.

Lögregla með málið til rannsóknar

Aron útskýrir að faðir sinn hafi verið í Búdapest í Ungverjalandi síðustu þrjá til fjóra mánuði. Hann hafi svo ætlað að snúa heim til að heilsa upp á son sinn en einnig til að sinna ýmsum erindum.

Hann hafi farið um borð í flugvél, með aðstoð vinar síns, en síðan komið sér út áður en hún tók á loft. Hann hafi svo stigið upp í strætisvagn. 

Aron segir að sími föður síns hringi ekki út en að lögreglan á Íslandi, sem hefur málið einnig til rannsóknar, hafi nú fartölvu Hákons undir höndum og reyni að gá hvort hægt sé að finna síðustu GPS-skráningu í farsíma hans (svo sem með forritinu „Find my iPhone“).

Starfsfólk farið að kannast við hann

Vísir ræddi einnig við starfsmann hótelsins þar sem Hákon dvaldi. Hann sagði starfsfólk hafa verulegar áhyggjur af Hákoni enda væri það farið að þekkja vel til hans þar sem hann hefði dvalið á hótelinu í rúman ársfjórðung.

Hótelstarfsmaðurinn segir að Hákon hafi virst utan við þegar hann yfirgaf hótelið. 

Þá bendir starfsmaðurinn á að sama kvöld og Hákon hvarf hafi verið kosningar í Ungverjalandi og fjöldi á götum úti að fagna. Því auðvelt fyrir Hákon að týnast í mannfjöldanum.