Fengu tveggja ára bann fyrir að svindla á þol­prófi

Í byrjun ársins bárust fréttir af því að Nachevski og Nikolov hefðu verið settir út af sakramentinu fyrir að senda falsað myndband til EHF þar sem þeir þreyttu þolpróf til að þeir fengju að dæma á EM 2026.

Fyrirtækið Fitgood Pro, samstarfsaðili EHF, fór yfir myndböndin sem þeir Nachevski og Nikolov skiluðu inn og taldi að þau væru fölsuð. Norður-Makedóníumennirnir fengu þar af leiðandi ekki að dæma á Evrópumóti karla í janúar.

EHF sendi í dag frá sér yfirlýsingu þess efnis að Sportradar, samstarfsaðili sambandsins í siðferðismálum, hefði komist að þeirri niðurstöðu að átt hefði verið við myndböndin sem Nachevski og Nikolov skiluðu inn fyrir EM.

Þeir félagar mega ekki dæma á vegum EHF né koma að neinu sem viðkemur sambandinu í tvö ár. Hvor um sig fékk einnig fimm þúsund evra sekt sem jafngildir rúmlega sjö hundruð þúsund íslenskra króna.

Nachevski og Nikolov hafa verið í fremstu röð dómara í handboltaheiminum undanfarin ár. Þeir hafa áður verið sakaðir um að vera með óhreint mjöl í pokahorninu en í rannsóknarheimildaþætti TV 2 frá 2023 voru þeir bendlaðir við hagræðingu úrslita.

Ekki tókst þó að sanna sök þeirra og þeir dæmdu á öllum stórmótum þar til á EM í janúar þar sem þeir sátu heima eftir að hafa svindlað á þolprófinu.