Sakaður um svindl eftir að hafa hlaupið hraðar en Bolt

Gout Gout kom í mark á 19.67 sekúndum í 200 metra hlaupi á heimavelli í Ástralíu um helgina.

Sá tími hefði dugað til að vinna gullverðlaun í greininni á Ólympíuleikunum í París 2024 og er heimsmet í undir 20 ára aldursflokki.

Usain Bolt átti fyrra aldursflokkametið en Gout Gout bætti það um 26 sekúndubrot. Heimsmet Bolt í greininni, upp á 19.19 sekúndur, stendur þó enn.

Þó tíminn hafi verið staðfestur af mótshöldurum hafa margir dregið þetta afrek í efa. Gout Gout hljóp nefnilega í meðvindi upp á 1.7 metra á sekúndu. Sem er rétt undir löglegum mörkum, 2.0 metrum á sekúndu. 

Þá þykir það ótrúlegt að sjö af átta keppendum hafi náð persónulegum metum í þessu hlaupi.

„Ég velti þessum tíma fyrir mér… Allir í efstu sjö sætunum bættu persónuleg met og allir í efstu fimm sætunum bættu sig um meira en tuttugu sekúndubrot,“ skrifar hlaupasérfræðingurinn Jonathan Gault á X.

Spretthlauparinn Erin Brown tekur sterkar til orða og segir hreint út að tíminn hefði aldrei átt að standa.

„Þetta er augljóslega fals tími. Hann hljóp 20.4 í fyrra hlaupinu. Aidan Murphy varð í öðru sæti og bætti sinn besta tíma frá 20.41 sekúndu niður í 19.88 sekúndur,“ sagði Brown á TikTok.

Aðrir hafa þó bent á að sama hvernig aðstæður voru sé þetta merkilegt afrek.

„Tíminn er mjög merkilegur, sama þó hann hafi verið settur við frábærar aðstæður. Þeir virðast hafa verið heppnir með vindátt. Vindurinn gæti líka hafa blásið vel inn í beygjuna, þannig að þau fengu hraða þar sem mældist kannski ekki á mælunum,“ sagði Vebjorn Rodal við NRK.