Mæla gegn því að ganga ofar en að Steini í Esjunni

„Náttúruleg snjóflóð hafa fallið víða á landinu sem staðfestir veikleika í snjóþekjunni en einnig hafa orðið nokkur snjóflóð af mannavöldum en engin slys. Einnig má búast við að spýjur falli þegar sól fer að skína á brekkur,“ segir í tilkynningu frá Veðurstofunni.

Kanni aðstæður vel

Þar hvetur snjóflóðavakt fólk á ferð í fjalllendi til að kanna vel snjóflóðaaðstæður áður en haldið sé af stað.

„Hægt er að nýta sér hallakort Veðurstofunnar fyrir leiðarval og gefin er út snjóflóðaspá fyrir ákveðin svæði daglega á vef Veðurstofunnar. Hafa skal þó í huga að spárnar gefa almenna mynd af spásvæðunum en gefa ekki upplýsingar um aðstæður í einstaka brekkum,“ segir í tilkynningunni.

Þar segir einnig að vel viðri til útivistar og að spár geri ráð fyrir austlægum áttum (3-10 m/s) og að mestu úrkomulaust en snjókoma á köflum á norðaustanverðu landinu og einhver él meðfram suðurströndinni. Hiti í dag er um eða undir frostmarki.

Á morgun, páskadag, sé útlit fyrir norðaustan 8-13 m/s með éljum norðan og austanlands en að mestu hægari vindur og þurrt um landið suðvestanvert og þar má jafnvel búast við að sólin láti sjá sig á köflum.