Ey­gló fær rós í hnappa­gatið í miðri meiðsla­mar­tröðinni

Eygló tryggði sér Evrópumeistaratitilinn í -71 kílóa flokki í apríl í fyrra og varð þá fyrsti Íslendingurinn til að verða Evrópumeistari í opnum aldursflokki í ólympískum lyftingum.

Þessi árangur lagði ekki aðeins grunninn að sigri hennar í kjörinu á Íþróttamanni ársins heldur hefur Eygló einnig fengið flotta alþjóðlega viðurkenningu.

Hún er nefnilega meðal tíu kvenna sem tilnefndar eru sem lyftingakonur ársins hjá Evrópska lyftingasambandinu. Verðlaunin verða veitt á Evrópumeistaramótinu í Georgíu um miðjan apríl.

Meiðsladraugurinn hefur ekki látið Eygló vera síðan að EM-gullið kom í hús, hún missti fyrst af heimsmeistaramótinu í lok síðasta árs vegna meiðsla og annað áfall á dögunum varð til þess að hún getur ekki varið titil sinn á Evrópumótinu í ár.

Í síðustu viku greindi Eygló frá því að hún hefði rifið brjóskþófa á æfingu sem endaði með því að Eygló féll í yfirlið á sjúkrahúsinu.

Meiðslin litu þó betur út en hún óttaðist í fyrstu og Eygló ætti að geta byrjað æfingar aftur fljótlega. Fréttir gærdagsins eru dýrmætar fyrir Íþróttamann ársins á þessum erfiðu vikum.