Ekki gert ráð fyrir því að eini sýslu­maðurinn hafi að­setur á höfuð­borgar­svæðinu

Í byrjun febrúar samþykkti Alþingi frumvarp þess efnis að fækka embættum sýslumanna úr níu í eitt. Lögin taka gildi 1. janúar 2027 og hefur dómsmálaráðherra tæpt ár til að undirbúa stofnun embættisins. 

Liður í því er að ráða sýslumann en hjá embættinu munu starfa um 250 starfsmenn víða um land. Ekki er gert ráð fyrir því að sýslumaðurinn hafi aðsetur á höfuðborgarsvæðinu og er skipað í embættið í fimm ár í senn.

Sýslumaðurinn mun fara með framkvæmdarvald og stjórnsýslu ríkisins í héraði og auk lögbundinna verkefna annast hann framkvæmda verkefna fyrir aðrar ríkisstofnanir eða stjórnvöld samkvæmt samningi.

„Stofnun hins nýja embættis er eitt stærsta breytingaverkefnið á sviði stjórnsýslu á undanförnum árum. Sýslumaður mun leiða undirbúning og innleiðingu sameiningarinnar í nánu samstarfi við ráðuneytið, með áherslu á fagmennsku, stöðugleika og traust,“ segir í fréttatilkynningunni.

Nánari upplýsingar um starfið og hæfniskröfur er að finna á Starfatorgi.