Leggur til ein­falt ráð í bar­áttunni við verð­bólguna

Hagstofan birti verðbólgutölur marsmánaðar í morgun og þar má sjá að verðbólga jókst úr 5,2 prósentum í 5,4 prósent milli mánaða.

Verð á mat og óáfengum drykkjum hafi hækkað um 0,7 prósent og haft 0,11 prósenta áhrif á vísitöluna til hækkunar, verð á bensíni hafi hækkað um 5,8 prósent og haft 0,10 prósenta áhrif til hækkunar og verð á dísel hafi hækkað um 6,9 prósent og haft 0,05 prósenta áhrif til hækkunar.

Syrtir í álinn

Már Wolfgang Mixa, dósent í viðskiptafræði, rifjaði í gær upp orð sem hann lét falla í Sprengisandi á Bylgjunni í febrúar.

„Maður veltir því fyrir sér hvort það væri hugsanlega hægt, eins og er verið að gera á hinum Norðurlöndunum, að lækka skatta á meðal annars matvæli og að mínu mati væri það augljós leið til að bæta hag heimilanna og til að ná verðbólgudraugnum eitthvað niður,“ sagði hann þá.

Í færslu á Facebook segir hann að síðan þau orð féllu hafi verðbólguhorfur versnað enn frekar og ekki hafi svo bætt úr skák stríðið í Íran. 

Myndi hjálpa þeim sem blæðir mest

Fram hafi komið að Svíar ætli tímabundið að draga úr bensínsköttum, en dræmt sé tekið í slíkar hugmyndir hérlendis. Auk þess hafi margoft verið bent á að hátt vaxtastig bitni helst á þeim sem eru að taka sín fyrstu skref í barneignum og að stækka við sig húsnæði.

„Einfalt ráð væri að lækka vsk á matvæli og líta svo sérstaklega til vsk prósentu barnavara. Þannig myndi verðbólga lækka, sem drægi úr áhrifum á hækkunum opinberra gjalda. Áhrifin væru skörp og gagnast mest þeim hópum sem nú blæða mest sökum hás vaxtastigs.“