Lykil­menn lýsa yfir stuðningi við Al­freð

Þýska landsliðið vann til silfurverðlauna á Evrópumótinu í upphafi þessa árs og voru það önnur verðlaunin sem liðið vinnur til undir stjórn Alfreðs. 

Núgildandi samningur Íslendingsins við þýska handknattleikssambandið rennur út eftir komandi Heimsmeistaramót í upphafi næsta árs sem fer einmitt fram í Þýskalandi. 

Nú er nýafstaðið landsliðsverkefni þar sem að þýska landsliðið spilaði tvo æfingarleiki gegn Egyptum og vann báða fyrir það verkefni var Alfreð spurður út í framtíð sína í starfi.

„Ég hef aldrei farið leynt með það að ég vilji ekki hætta í handbolta strax eftir heimsmeistaramótið og myndi gjarnan vilja halda áfram að vinna með þessu liði,“ sagði Alfreð og varpaði boltanum til forráðamanna þýska handknattleikssambandsins.

Þakklátur fyrir Alfreð

Eftir seinni leikinn gegn Egyptum voru lykilmenn þýska landsliðsins, Juri Knorr og Johannes Golla spurður út í stöðuna og mátti greina ánægju þeirra með samstarfið við Alfreð sem hefur verið landsliðsþjálfari Þýskalands frá árinu 2020. 

„Við sem lið erum að nálgast okkar besta stað,“ sagði fyrirliðinn Golla sem bætti við að andinn í liðinu væri góður, liðsheildin og sjálfstraustið mikið.

„Við erum að reyna nýta tíma okkur með Alfreð til hins ítrasta. Halda áfram að feta þann sigursæla stíg sem við höfum verið á saman eins lengi og mögulegt er, með eins mörgum sigrum og hægt er að ná.“

Juri Knorr var á svipuðum nótum en hrósaði Alfreð í hástert.

„Ég hef bara starfað með Alfreð í landsliðinu og ég er mjög þakklátur fyrir allt það sem hann hefur gert mér kleift að afreka. Ég vonast til þess að við höldum áfram að starfa saman,“ sagði Knorr sem bætti við að leikmenn landsliðsins væru ekki að velta sér mikið upp úr stöðunni.