Lent í lægðasúpu og út­lit fyrir vetrar­ríki út mánuðinn

„Við erum eiginlega lent í lægðasúpu. Þær bíða í röðum eftir að komast til okkar lægðirnar. Þessi sem veldur þessu veðri, sem hefur gengið á með mjög dimmum éljum í dag, hún liggur fyrir vestan land og er á leiðinni norðaustur. Næsta lægð kemur upp að landinu annað kvöld og þá fer að hvessa á nýjan leik með snjókomu.“

Þetta segir Sigurður Þ. Ragnarsson veðurfræðingur, einnig þekktur sem Siggi Stormur. Él muni láta sjá sjá sig fyrri hlutann á morgun og í kjölfarið komi næstu tvær lægðir á mánudag og fimmtudag.

„Þannig það er útlit fyrir að það verði vetrarríki hjá okkur það sem eftir lifir af þessum mánuði. Það er bara einfaldlega þannig,“ sagði hann í kvöldfréttum Sýnar.

Spáin geti þrátt fyrir allt enn tekið breytingum þar sem næstu lægðir eigi enn eftir að taka á sig mynd.

Mjög vont veður í sumum landshlutum á morgun

„Þessi lægð sem er í dag og þessi lægð sem kemur annað kvöld og aðra nótt, þær munu setja mark sitt á veðrið með mjög vondu veðri á Suðaustur- og Austurlandi og snjókomu, þar á meðal í Reykjavík á sunnudag. Þannig að snjórinn er kominn til að vera í bili í það minnsta,“ segir Sigurður.

Næsta lægð muni hafa áhrif á mestallt landið. Austurland hafi sloppið einna best í dag en fái sinn skammt annað kvöld eða aðfaranótt sunnudags.

„Á sunnudaginn þá verða þeir ekki í blíðu nema síður sé. En þá verður líka snjókoma hjá okkur flestum þannig að það verður éljagangur eða snjókoma. Allra syðst gæti rignt yfir ströndina og þá er ég að tala um Suðausturlandið þannig að það er vetrarríki í kortunum.“