Náðu loksins saman um að bjarga WNBA eftir hundrað klukku­tíma við­ræður

Eftir mjög langar kjaraviðræður náðu WNBA-deildin og leikmannasamtök kvenna í körfuknattleik (WNBPA) munnlegu samkomulagi um skilmála nýs kjarasamnings snemma á miðvikudag.

„Sá árangur sem náðst hefur í þessum viðræðum markar umbreytandi skref fram á við fyrir leikmenn og deildina,“ sagði Cathy Engelbert, framkvæmdastjóri WNBA.

Í fararbroddi í kvennaíþróttum

„Þetta hefur verið ferli, en við erum mjög stolt af því að vera í fararbroddi í kvennaíþróttum, þessir leikmenn eru magnaðir og við munum eiga magnað 30. keppnistímabil sem hefst í maí,“ sagði Engelber.

Engelbert, Terri Carmichael Jackson, framkvæmdastjóri WNBPA, og fjórir meðlimir framkvæmdastjórnar WNBPA – forsetinn Nneka Ogwumike, varaforsetarnir Breanna Stewart og Alysha Clark og gjaldkerinn Brianna Turner – deildu fréttunum með fréttamönnum í anddyri The Langham hótelsins á mið-Manhattan, þar sem yfir hundrað klukkustunda maraþonviðræður þeirra hófust viku áður.

Valdefling leikmanna

„Ég held að þetta megi draga saman í tveimur orðum: valdefling leikmanna. Leikmenn sem koma að borðinu, standa á sínu og eru minntir á sameiginlega rödd sína og hvað það þýðir að vera í stéttarfélagi og kraft þess. Þeir gleymdu því aldrei og hafa, eins og þeir gera alltaf, tekið það á næsta stig,“ sagði Jackson.

Enn á eftir að ganga frá formlegum samningsskilmálum og samningurinn er háður staðfestingu leikmanna og stjórnar WNBA.

Búist er við að æfingabúðir hefjist 19. apríl, síðan hefjast undirbúningsleikir 25. apríl og venjulegt keppnistímabil hefst 8. maí.

Nákvæm dagskrá fyrir restina af undirbúningstímabilinu var ekki tilkynnt, þó að deildin verði enn að halda leikmannaval fyrir tvö ný lið og samningalausir leikmenn, sem eru yfir hundrað, geta samið við lið þegar samningurinn hefur verið staðfestur, sem gæti tekið nokkrar vikur. Nýliðavalið er áætlað 13. apríl.

Þetta verður sjötti kjarasamningurinn í sögu deildarinnar í kjölfar samninga árin 1999, 2003, 2008, 2014 og 2020.

Við erum stolt af okkur

„Við erum bara virkilega þakklát fyrir að hafa náð samkomulagi. Við erum stolt af okkur. Og satt best að segja sögðum við ykkur alltaf að við myndum standa á okkar og þannig lítur það út,“ sagði Ogwumike.

Samningurinn er til þess fallinn að endurspegla ört vaxandi vinsældir og vöxt deildarinnar, en áhorf, aðsókn og fjárfestingar hafa náð sögulegu hámarki á undanförnum árum.

Allir fá nákvæmlega það sem þeir eiga skilið

„Í fyrsta skipti eru laun leikmanna tengd raunverulega marktækum hluta af tekjum deildarinnar, sem knýr fram veldisvöxt í launaþakinu, hækkar meðallaun yfir hálfa milljón dollara og hækkar staðalinn varðandi aðstöðu, starfsfólk og stuðning,“ sagði Ogwumike.

„Þessi samningur mun breyta mjög miklu,“ sagði Stewart. „Hann mun byggja upp og hjálpa til við að skapa kerfi þar sem allir fá nákvæmlega það sem þeir eiga skilið og meira til, bæði innan og utan vallar. Ég er bara spennt fyrir því að geta sagt aðdáendum okkar að við séum að koma aftur.“ sagði Stewart.