Klofningur nefndarinnar helstu tíðindin og verka­lýðnum hótað

Peningastefnunefnd hefur ákveðið að hækka stýrivexti um 25 punkta og þeir fara því úr 7,25 prósentum í 7,5. Vextir höfðu fyrir það staðið í stað í 7,25 prósentunum síðan í nóvember síðastliðnum.

„Mér finnst eiginlega helstu tíðindin í dag vera að ekki nóg með það að peningastefnunefnd hafi ákveðið að hækka vexti, heldur að nefndin hafi verið klofin í þessari afstöðu sinni. Það voru tveir nefndarmenn sem vildu hækka vexti meira, um hálft prósentustig. Þannig að mér finnst það eiginlega vera svona stóru tíðindin og hversu hörð þessi framsýna leiðsögn, það er að segja skilaboðin fram á við, hversu hörð þessi skilaboð voru, svona í ljósi þess hvernig skilaboðin voru í febrúar fyrir bara rétt rúmum mánuði síðan,“ sagði Erna Björg Sverrisdóttir, aðalhagfræðingur Arion banka, í samtali við Berghildi Erlu Bernharðsdóttur fréttamann að loknum blaðamannafundi í Seðlabankanum í morgun.

Mistök í febrúar

„Nefndin er jafnframt tilbúin að herða taumhald peningastefnunnar enn frekar til þess að tryggja hjöðnun verðbólgu að markmiði þótt það gæti hægt enn frekar á efnahagsumsvifum. Mótun peningastefnunnar mun sem fyrr ráðast af þróun efnahagsumsvifa, verðbólgu og verðbólguvæntinga,“ segir í framsýnni leiðsögn peningastefnunefndar en í febrúar var ekkert minnst á mögulega hækkun vaxta heldur var frekar talað um hvernig væri hægt að lækka vexti.

Voru þau þá eitthvað að mislesa aðstæður þá í febrúar eða hefur orðið svona mikil breyting?

„Það er auðvitað auðvelt að vera vitur eftir á en manni finnst að nefndin hafi kannski gert dálítil mistök í febrúar af því að þá var þessi framsýna leiðsögn, þa hljóðaði hún enn þá upp á frekari vísbendingar til vaxtalækkana. Og á sama tíma var samt verðbólgan komin í 5,2 prósent. Hún er búin að vera óbreytt milli funda. Vissulega hafa verðbólguvæntingar hækkað og það hefur auðvitað brotist út stríð í millitíðinni. En manni finnst samt sem áður að þetta sé algjör kúvending, sem hefur gerst á mjög skömmum tíma.“

Stíga skrefið sem var hótað í febrúar

Á blaðamannafundinum beindi seðlabankastjóri orðum sínum til verkalýðshreifingarinnar, enda virkjast forsenduákvæði stöðugleikasamninganna svokölluðu í ágúst og allt lítur út fyrir að skilyrði verði fyrir því að slíta samningum. 

Skilja mátti á seðlabankastjóra að hann vildi að verkalýðshreifingin myndi gjöra svo vel að halda að sér höndum ef til þess kæmi.

Hvað fannst þér um þessi skilaboð?

„Þetta er kannski að einhverju leyti framhaldið af þeim skilaboðum sem seðlabankastjóri og varaseðlabankastjóri komu með í febrúar. Hins vegar er breytingin núna að þeir eru að hækka vexti og eru einmitt að segja þá: Hafið þið í huga að þetta er staðan núna. Samanborið við það í febrúar þá var þetta kannski meira að ef samningarnir losna þá munum við hækka vexti. Þannig að það þeir stigu svolítið skrefið sem var hótað síðast.“

Þannig telji hún nokkuð skýrt að því hafi verið hótað, að ef þetta forsendaákvæði verður virkjað, að þá verða vextir hækkaðir.