Þakkaði ChatGPT fyrir silfrið: „Notaði þetta sem sál­fræðing, þjálfara og lækni“

„Undanfarna sex mánuði hef ég æft með ChatGPT,“ sagði Murashkovskyi eftir að hafa tryggt sér silfurverðlaunin á sunnudaginn.

„Þetta var ekki bara taktík. Þetta var hálft æfingaplanið mitt, hvatning og svo framvegis. Þetta var stór hluti af öllum æfingum mínum. Ég notaði þetta sem sálfræðing, þjálfara og stundum sem lækni,“ bætti Úkraínumaðurinn við.

Murashkovskyi sagði að án ChatGPT hefði hann æft eins og hann hefði alltaf gert en gervigreindin hefði opnað ýmsa nýja möguleika fyrir hann. 

Hann segir þó að þjálfarar af holdi og blóði þurfi ekki að hafa áhyggjur af samkeppninni við tæknina, allavega ekki enn sem komið er.

„Ekki algjörlega, næstu 5-10 árin. En hluta af þessu, klárlega,“ sagði Murashkovskyi aðspurður hvort gervigreindin myndi leysa mennska þjálfara af hólmi í nánustu framtíð. 

Murashkovskyi á enn eftir að keppa í þremur greinum á Vetrarólympíumóti fatlaðra. Úkraínumönnum hefur gengið vel í Mílanó og Cortina og unnið til tíu verðlauna. Aðeins Kínverjar hafa náð í fleiri medalíur til þessa á Vetrarólympíumótinu, eða sautján talsins.