„Ég veit ekki hvaða gjöf þú ert að tala um“

„Virkilega ánægður með frammistöðuna í dag. Við vorum að mæta góðu KA liði sem er búið að vera frábært, á gríðarlega erfiðum útivelli en við stöndum af okkur mjög erfiðan kafla í fyrri hálfleik þar sem að við héldum okkur við leikplanið og bara eitt mark í einu og náðum okkur svo í ágætis stöðu í hálfleik og svo er ég bara hrikalega ánægður með vinnusemina og hvernig við héldum á okkar málum í seinni hálfleik.“

KA byrjaði leikinn mun betur og komst þremur mörkum yfir en FH náði betri tökum eftir því sem leið á hálfleikinn. Lokamarkið kom þegar KA átti aukakast á síðustu andartökum hálfleiksins sem var framkvæmt hræðilega og Ómar Darri skoraði í tómt markið hinu megin sem tryggði FH tveggja marka forskot inn í hálfleikinn. Undirritaður kallaði það gjöf í viðtalinu sem Sigursteinn áttaði sig ekki alveg á.

„Ég veit ekki hvaða gjöf þú ert að tala um sko, ég var bara hrikalega ánægður, við vorum á tánum og kláruðu þennan hálfleik vel og komum okkur í þessa stöðu. Svo aftur, bara ógeðslega ánægður því þeir virkilega reyndu á okkur en ég er bara virkilega ánægður hvernig liðið stóð þetta af sér.“

FH spilaði kraftmikinn sóknarleik í dag þar sem margir lögðu sitt á vogarskálarnar.

„Við erum með fullt af flottum strákum sem eru líka svona aðeins að átta sig út á hvaða lífið gengur og þeir eru að bæta sig með hverjum leiknum og nú þurfa þeir að halda áfram að nýta sér þennan leik í framhaldinu en það gerist bara með því að mæta enn þá grimmari næst.“

„Við ætlum bara að brosa í kvöld og svo að undirbúa okkur vel fyrir ÍR á fimmtudaginn sem eru með bakið upp við vegg en við erum bara líka með okkar markmið sem við ætlum að klára og það gerum við vonandi með sigri á fimmtudaginn en svo tekur bara við önnur keppni en það þarf áfram að hafa sömu hlutina á hreinu“, sagði Sigursteinn að lokum en FH er í öðru sæti deildarinn fyrir lokaumferðina og getur enn orðið deildarmeistari ásamt topplið Vals og Haukum sem eru í þriðja sæti.