Sögu­legar sættir eftir að annar þeirra hafði verið við dauðans dyr

Askren og Masvidal mættust í bardagabúrinu í júlí árið 2019 í bardaga sem entist aðeins í fimm sekúndur. Á þeim tíma tókst Masvidal að rota Askren með fljúgandi hnésparki en fyrir bardagann höfðu þeir átt í hörðum orðaskiptum og andaði einnig köldu á milli þeirra eftir bardagann. 

Askren veiktist hins vegar illa á síðasta ári. Hann fékk afar slæma lungnabólgu eftir bakteríusýkingu og endaði á því að þurfa að fá ný lungu.

Askren var vart hugað líf á einum tímapunkti og sjálfur segist hann hafa dáið fjórum sinnum. Askren sagði sína sögu á samfélagsmiðlum á sínum tíma og fékk meðal annars heillaóskir frá Masvidal í kjölfarið.

Það var hins vegar á dögunum sem kapparnir tveir hittust augliti til auglitis í fyrsta skipti í langan tíma. Sögulegar sættir náðust þeirra á milli.

„Ég lærði það síðasta sumar að lífið er of stutt, klárlega of stutt til þess að eiga í deilum,“ skrifaði Askren í færslu á samfélagsmiðlum á laugardaginn síðastliðinn þar sem með fylgdi mynd af honum og Masvidal.

Það var Masvidal sem átti frumkvæðið að hittingi þeirra. Hann heimsótti Askren á heimili hans í Wisconsin. 

„Við settumst niður saman, borðuðum kvöldmat og ræddum málin. Þar kemur í ljós að við eigum meira sameiginlegt en ekki.“

Þeir grófu stríðsaxirnar og eru nú vinir.