„Ég er bara ekki nógu gáfaður til að geta rýnt al­menni­lega í þessa stöðu“

Lokatölur urðu 27-35 í leik þar sem Framarar gengu frá Valsmönnum í fyrri hálfleik.

„Mér fannst Breki frábær og vörnin góð. Sóknarlega vorum við agaðir og gerðum vel það sem við lögðum upp með. Þeir refsuðu okkur eitthvað sem Valur eru góðir í og ég held bara heilt yfir, að vinna Val hérna á þeirra heimavelli þá þarftu að spila bara ógeðslega vel og ég held að heilt yfir höfum við bara spilað ógeðslega vel,“ sagði Einar um frammistöðu sinna manna.

Fram leiddi með sex mörkum í hálfleik og oft getur reynt snúið að halda í góða forystu, sérstaklega gegn sterku liði eins og Valur er alla jafnan. Hvað sagði Einar því við sína menn í hálfleik?

„Það er alltaf þessi tugga, að fá á sig áhlaup og þurfa að halda áfram og þeir koma af krafti og blablabla. Við í raun ræddum það að við þyrftum bara að halda áfram að spila okkar leik og það gekk vel í fyrri hálfleik. Ég þurfti ekki að segja mikið, fórum bara yfir nokkur atriði. Við vorum með of marga tapaða bolta í fyrri hálfleik, það var eini gallinn í okkar leik. Þar fyrir utan vorum við nánast að spila óaðfinnanlega.“

Tuttugasta umferð Olís-deildarinnar lauk í kvöld og var þessi umferð í raun sú fyrsta af þremur sem spiluð verður á einni viku. Með góðum úrslitum í lokaumferðunum geta Framarar híft sig upp úr sjöunda sætinu þar sem þeir sitja núna. Leikurinn í kvöld var allavegana góður forsmekkur af því sem mögulega koma skal.

Aðspurður einmitt út í þetta framhald og möguleika Fram að fara ofar í töflunni, þá hafði Einar þetta að segja.

„Örugglega. Eru ekki allskonar úrslit sem þurfa að fara okkur í hag ef við ætlum að fara eitthvað mikið hærra í töflunni? Veistu það ég er bara ekki nógu gáfaður til að geta rýnt almennilega í þessa stöðu. Við eigum bara ÍBV á mánudaginn, það er bara næsti leikur. Við erum bara að reyna að bæta okkur með hverjum leiknum og reyna að koma inn í úrslitakeppnina af einhverjum krafti og þetta leit fínt út í dag. Við þurfum bara að halda haus og vera einbeittir áfram á verkefnið,“ sagði Einar að lokum.