Hamilton skýtur fast á and­stæðinga sína

„Tuttugu ár af ótrúlegum hæðum og hrottalegum lægðum. Fleiri mistök en ég get talið en þessi mistök gerðu þessa vegferð enn sætari. Þú heldur á lyklinum að örlögum þínum. Allt sem þú þarft til þess að skara fram úr býr innra með þér,“ skrifar Hamilton í færslu á samfélagsmiðlum.

Hann er á leið inn í sitt tuttugasta tímabil í Formúlu 1 sem hefst um komandi helgi í Albert Park í Melbourne þegar að tímabilið 2026 í Formúlu 1 hefst. Hamilton er á sínu öðru tímabili sem ökuþór Ferrari og eftir fremur erfitt fyrsta tímabil hjá liðinu goðsagnakennda vonast hann til þess að gera mun betur í ár.

Hamilton er sá ökuþór, ásamt Michael Schumacher, sem hefur unnið felsta heimsmeistaratitla ökuþóra í mótaröðinni. Alls eru heimsmeistaratitlarnir sjö talsins.

Bretinn varð fjörutíu og eins árs fyrr á árinu og er stóra spurningin sú hvort hann hafi það enn í sér að berjast um heimsmeistaratitil og hvort hann fái í því verkefni bíl sem getur keppt um sigur.

Hamilton er þakklátur fyrir allar lexíurnar sem hann hefur lært á þessum tuttugu árum sínum í Formúlu 1. Þakklátur fyrir rólegum tímana en einnig þá viðburðaríku sem og fólkið sem hefur hjálpað honum á leiðinni.

„Ég er þakklátur fyrir efasemdamennina og þá sem reyndu að slá mig niður. Ég er enn hér. Tuttugu árum síðar. Enn standandi. Enn hungraður og einbeittur á draum minn. Ég held ekki aftur að mér.“

Sýn Sport Viaplay er heimili Formúlu 1 á Íslandi. Bein útsending frá öllum keppnishelgum tímabilsins fer fram á stöðinni og eru það Pittsbræðurnir Bragi Þórðarson og Kristján Einar Kristjánsson sem lýsa herlegheitunum.