Sigur­ganga stráka Guð­jóns Vals heldur á­fram en tap hjá Bjarka

Gummersbach vann í kvöld átta marka heimasigur á ThSV Eisenach, 35-27.

Gummersbach var fjórum mörkum yfir í hálfleik, 17-13.

Íslendingarnir voru rólegir í fyrri hálfleiknum, Elliði Snær Viðarsson nýtti eina skotið sitt en Teitur Örn Einarsson klikkaði á báðum skotum sínum.

Elliði bætti við einu marki í seinni hálfleik og skoraði því tvö mörk en Teitur komst ekki á blað. Hann gaf þó eina stoðsendingu inn á línuna. Miro Schluroff var markahæstur með tólf mörk.

Gummersbach er í sjötta sætinu með 29 stig, þremur stigum á eftir Kiel sem situr í fimmta sætinu.

Gummersbach hefur unnið 13 af 21 deildarleik tímabilsins og aðeins tapað fimm leikjum.

Íslenski landsliðsmaðurinn Bjarki Már Elísson og félagar hans í ungverska liðinu Vesprém koma stigalausir heim frá Póllandi eftir tap í Meistaradeildinni í handbolta í kvöld.

Vesprém tapaði með einu marki, 36-35, í æsispennandi leik á móti heimamönnum í Industria Kielce.

Bjarki nýtti öll þrjú skotin sín í fyrri hálfleiknum en Vesprém var tveimur mörkum yfir í hálfleik, 19-17.

Bjarki fékk ekki að spila í seinni hálfleiknum. Vesprém var 34-33 yfir en tapaði síðustu tveimur mínútunum 3-1 og þar með leiknum 36-35.