Kristinn Jón tekur slaginn við Alexöndru

„Reykjavík stendur á tímamótum! Við getum haldið áfram þeirri vinnu að byggja upp framsækna, græna og barnvæna borg eða látið aðra um að leysa áskoranir nútímans með afturhvarfi í gamlar lausnir. Ég gef kost á mér að leiða Pírata í Reykjavík fyrir komandi borgarstjórnarkosningar - því ég hef áratuga reynslu á að koma mikilvægum breytingum í höfn í oft ósveigjanlegu umhverfi,“ segir Kristinn Jón í framboðstilkynningu á Facebook.

Hann hvetur þá sem vilja taka þátt og styðja hann til að skrá sig í Pírata og taka þátt í prófkjörinu. Þeir sem vilja taka þátt í prófkjörinu þurfa að vera orðnir félagar í Pírötum fyrir miðnætti í kvöld.

„Sem 45 ára fjölskyldufaðir vil ég leiða borgina inn í mannvæna, græna og örugga framtíð sem byggir á gagnadrifnum ákvörðunum og framúrskarandi þjónustu á forsendum íbúa. Ég vil hlúa að frelsi barnanna okkar í borginni með m.a. vistvænum samgöngu­m, fjölbreyttum frístundum og aðgengilegum grænum leiksvæðum. Ég trúi því að hægt sé að stuðla að jákvæðum breytingum í enn nánara samráði, samvinnu og sátt við íbúa.“