Of seinn til að sjást í mynd: „Þetta er bara á allt of lágu plani“

„Þetta er bara á allt of lágu plani, þegar menn eru að bjóða upp á svona bull,“ sagði Benedikt Guðmundsson yfir myndum af skelfilegum sendingum og fleiri mistökum leikmanna Álftaness, í tapinu gegn „grútþunnum“ bikarmeisturum KR.

Það er í raun óskrifuð regla að nýkrýndir bikarmeistarar tapi fyrsta leik eftir fagnaðarlæti sín en það átti ekki við um KR-inga. Sérfræðingarnir skrifuðu það á andleysi gestanna.

„Það er ekkert effort í þessu. Okeke til dæmis, hann hleypur ekki vörn og hann hleypur ekki sókn. Hann er bara á skokkinu. Hann er varla í mynd því hann er alltaf seinn, sama hvar hann er á vellinum. En þetta er ekki bara hann. Það er einhver neisti sem vantar þarna,“ sagði Teitur Örlygsson. Hann segir tímabilinu í raun lokið í huga Álftnesinga:

„Justin James átti að redda þessu, og reyndi að redda þeim í þessum leik, en það er ekki nóg. Ég held að Álftanes hafi enga trú á þessari úrslitakeppni, sem þeir eru að fara í, og menn séu farnir að hugsa um að brjóta þetta lið upp og búa sig undir næsta ár.“