Finnst ekki skemmti­legt að keyra nýja For­múlu 1 bílinn

Eftir fyrstu prufukeyrslur á mikið breyttum Formúlu 1 bíl hefur fjórfaldi heimsmeistarinn Max Verstappen látið óánægju sína í ljós. Hann segir nýja Red Bull bílinn ekki skemmtilegan og allt of ólíkan fyrri árgerðum.

Formúla 1 hefur breytt reglugerðinni fyrir bílasmiði mjög mikið milli tímabila. Nýju bílarnir verða minni, mjórri, léttari, meira knúnir af rafmagni og hið hefðbundna DRS kerfi heyrir nú sögunni til.

Bílstjórarnir tóku prufukeyrslu í Barcelona undir lok síðasta mánaðar og eru nú mættir til Barein í aðra prufukeyrslu.

Max Verstappen tjáði sig eftir æfingu:

„Að keyra þá er ekki mjög skemmtilegt, ef ég á að vera alveg hreinskilinn. Þetta er kannski ekki fallegt af mér að segja. En sem ökumaður finn ég ekki þessa Formúlu 1 tilfinningu, þetta er meira eins og Formúlu E bíll á sterum.“

Þetta er harðasta gagnrýnin sem þessi nýja kynslóð af Formúlu 1 bílum hefur fengið en í gær sagði sjöfaldi heimsmeistarinn Lewis Hamilton að nýju reglurnar væru „fáránlega flóknar“ og „enginn áhorfandi á eftir að skilja þær.“

Ríkjandi heimsmeistarinn Lando Norris hefur ekki tjáð sig um málið en yfirburðir McLaren bílsins á síðasta tímabili áttu mikinn þátt í titlinum.

Nýtt tímabil í Formúlu 1 hefst í Ástralíu þann 8. mars næstkomandi.