Læknar sögðu að hann þyrfti að hætta og pabbi mætti loksins á leik

Kenneth Walker III varð í nótt fyrsti hlauparinn sem útnefndur er verðmætasti leikmaður Super Bowl á þessari öld, og aðeins sá áttundi í sögunni. Hann hljóp 135 jarda fyrir Seattle Seahawks sem unnu afar öruggan 29-13 sigur gegn New England Patriots.

Kvöldið varð þannig að algjöru draumakvöldi fyrir Walker, sem og nafna hans og pabba. Saman hafa þeir upplifað ýmislegt því þegar Walker yngri var í menntaskóla fékk hann blóðtappa í lungun og þegar pabbinn sat við sjúkrabeðinn, hlustandi á lækna segja að fótboltaferillinn yrði ekki lengri, var eflaust erfitt að ímynda sér MVP-verðlaun og sigur í Super Bowl.

„Pabbi er alltaf að koma til Seattle og hann horfir á leikina en hann mætir aldrei á leiki því hann kann ekki við mannmergðina,“ sagði Walker yngri við CNN eftir sigurinn í nótt.

„Þetta er því fyrsti NFL-leikurinn hans og við unnum Super Bowl svo það hefur mikla þýðingu fyrir mig og ég veit að hann er stoltur af mér,“ bætti hann við.

Eins og fyrr segir var ekkert útlit fyrir það að Walker næði svona langt, þegar hann var í menntaskóla:

„Þegar læknarnir sögðu mér að ég gæti ekki spilað meira þá hélt ég bara að ferlinum væri lokið. Þetta var það sem ég hafði gert alla daga og þetta var algjört áfall en pabbi var með mér á spítalanum og studdi mig í gegnum allt ferlið, sem og mamma mín.

Að hafa komist í gegnum veikindin gerði mig þakklátan fyrir hvern dag og fyrir að geta reimað á mig skóna og spilað þennan leik, fullur af lífi,“ sagði Walker.