„Stuðlabergið er bara komið út í sjó“

Guðna Einarssyni, bónda og landeiganda í Reynisfjöru, var mjög brugðið að sjá breytinguna á Reynisfjörunni um helgina. 

„Þetta er þekkt hjá okkur, Reynisfjaran nær á milli Dyrhólaeyjar og Reynisfjalls, og við höfum oft upplifað að sandurinn hafi færst fram og til baka. Það grefur úr austur við Reynisfjall en hleður í vestur við Dyrhólaey. Sjórinn er búinn að hreinsa burt allan sandinn sunnan undir Reynisfjallinu og stuðlaberginu. Stuðlabergið er bara komið út í sjó og hann bara flytur þetta vestar á fjörurnar.

Hann segir þetta sérstaklega gerast í austanáttum og svo þegar vindurinn fer í suðvestanáttir þá komi sandurinn oft til baka,“ segir Guðni.

Gætu orðið berskjaldaðir við bílastæðið

„En þetta sem gerðist þarna núna hefur aldrei gerst áður. Þetta er í það miklu mæli. Það gróf svo langt inn þarna við Reynisfjallið, þar er mikið aðdýpi. Þetta er sjálfsagt um hundrað metrar sem hefur grafið þarna inn. Þar fyrir utan er mikið dýpi og það er sjálfsagt eitthvað komið þarna inn. Ef það gerir mikið brim, þá gætum við orðið berskjaldaðir varðandi bílastæðið í Reynisfjöru.“

Hann áætlar að það séu um hundrað metrar í bílastæðið.

„Við eigum von á því að þessi sandur skili sér til baka ef það breytir um vindátt og strauma, en það er spurning hvort við fáum mikið brim og vont veður áður en það gerist,“ segir Guðni.

Eins og má sjá á myndum er mikið stórgrýti í fjörunni sem ekki hefur sést þar áður. Hann segir sjóinn hafa rótað því upp og vestar á fjöruna. Hver steinn sé stór og líklega um tonn að þyngd.

Fjaran gjörbreytt

„Þetta eru ógurlegir kraftar. Blágrýti eru steinar sem eru frá einu og upp í tvö tonn. Það gengur mikið á.“

Hann segir fjöruna ekkert hættulegri í þessum aðstæðum en hún sé gjörbreytt frá því sem hún var í haust.

„Fólk kemur og sér hvernig þetta er og fólk kemst ekkert ofan í fjöruna fyrir framan göngustíginn heldur getur farið vestur á fjöruna. Það er mjög mikilfenglegt að sjá þetta eins og þetta er núna í dag. Fjaran er ekkert hættulegri, hún er gjörbreytt.“

Guðni segist hafa séð þetta fyrst í fyrradag og segir hafa brugðið.

„Ég átti ekki von á því að þetta myndi gerast, og ég átti ekki von á að þetta myndi gerast svona hratt. Sjórinn hefur aldrei farið svona langt inn, allavega hvað núlifandi menn muna.“

Guðni segir veðrið búið að vera óvanalegt.

„Þessar stífu austanáttir sem eru búnar að vera svo vikum skiptir, það er mjög hvasst við suðurströndina og hefur verið mikið brim samfara þessu. Þessi veðurstaða sem er búin að vera og hefur gert það að verkum að við fáum ekki vetur enn þá,“ segir Guðni.

Hann segir þetta veður þó mjög þægilegt og að vera laus við snjóinn spari pening.

„Þetta er eitthvað sem enginn ræður við og við verðum bara að bíða og sjá og vona að sandurinn gangi til baka. Þetta hefur engin áhrif á Reynisfjöruna. Hún er enn áhugaverður og mikilfenglegur staður.“

Jóhanna Malen Skúladóttir, náttúruvársérfræðingur á Veðurstofu Íslands, segir hafa verið stöðuga austanátt undanfarið og hafaldan hafi verið eftir því.

„Hún hefur sópað þessu vestur og væntanlega þegar vindáttin snýst kemur þetta til baka,“ segir hún um landrofið í Reynisfjöru.

Hún segir óvanalegt að vindáttin haldist sú sama svona lengi á einum stað. Hafaldan sé afar kröftug þarna og það útskýri væntanlega breytinguna á landinu.

Brá verulega

Birna Viðarsdóttir býr á Norður-Hvoli í um tíu kílómetra fjarlægð frá Reynisfjöru og tók myndir í gær sem má sjá í fréttinni. Hún segir breytinguna verulega.

„Ég fór í gær og manni brá að sjá þetta. Maður hefði aldrei trúað þessu. Það er bara við hliðið, þar sem er venjulega stígur til að ganga í hellinn eftir fjörunni, þar er sjórinn ólgandi. Manni brá verulega að sjá þetta.“

Hún segir steinana stóra sem hafa færst til í fjörunni.

„Maður fer þarna öðru hvoru, þetta er uppáhalds staðurinn minn, svo ofboðslega fallegt,“ segir hún.