Vinna hafin en langur vegur að stofnun nýs knatt­spyrnu­fé­lags í Breið­holti

Þungavigtar vinnuhópur kemur með hugmyndina

Hugmyndin um sameiningu ÍR og Leiknis hefur lengi verið á lofti, alveg síðan um aldamótin, en nú er mun meiri skriðþungi í umræðunni en áður.

„Það sem er öðruvísi núna er að það er rosalega mikill þungi í þessum vinnuhóp sem kemur með þessa tillögu. Þetta eru jarðýtur sem hafa starfað mikið fyrir knattspyrnu. Þetta eru allt Breiðhyltingar sem vita hvað þeir eru að gera. Það er það sem er öðruvísi núna, það er meiri þungi á bakvið þetta“ sagði Brynjar Már Bjarnason, formaður knattspyrnudeildar ÍR, í viðtali við Fótbolta.net í gærkvöldi.

Þessi vinnuhópur sem hann talar um samanstendur meðal annars af Leiknismönnunum Gunnari Jarli Jónssyni og Þórði Einarssyni, sem héldu kynningarfundinn í gær. Auk þess hefur Davíð Snorri Jónasson, aðstoðarlandsliðsþjálfari, tekið virkan þátt í umræðunni.

Kynningarfundur og nefndir hefja störf 

Í gærkvöldi hélt knattspyrnudeild ÍR kynningarfund fyrir félagsmenn þar sem starfshópur kynnti verkefnið og í kjölfarið voru skipaðar sex nefndir, með fulltrúum úr báðum félögum, sem eiga að vinna að útfærsluatriðum.

Má þar nefna laganefnd sem sér um að útbúa ný lög, rekstrarnefnd sem skoðar hvernig rekstrarformið yrði, markaðsnefnd sem útbýr nýja ásýnd félagsins o.s.frv…

Að mörgu þarf að huga til að þetta takist. 

Væntanlega verður líka eitthvað rætt innan nefndanna um hvernig málum skal háttað í kvennaflokki. Leiknir hefur ekki sent kvennalið til leiks síðan árið 2019 og á síðasta ári hætti allt kvennalið ÍR á einu bretti og ásakaði stjórn knattspyrnudeildar um vanrækslu. 

Stefna starfshópsins er svo að kynna fullmótaða hugmynd á aðalfundi ÍR og aðalfundi, sem haldnir eru í apríl á hverju ári.

Aðalstjórn ÍR ekki hlynnt hugmyndinni 

Á aðalfundunum í apríl, eða fyrir þann tíma, mun starfshópurinn þurfa að snúa hugum margra sem eru mótfallnir hugmyndinni.

Vísir ræddi við formann aðalstjórnar ÍR, Vigfús Þorsteinsson, sem sagði grænt ljós ekki komið á þetta verkefni. Upphaflega hafi hugmyndin verið kynnt fyrir honum sem sameining félaganna í heild sinni, en nú er einungis talað um knattspyrnudeildirnar og það hugnist aðalstjórn ekki.

„Þetta hugnast aðalstjórn ekkert sérstaklega, að slíta félagið í tvennt. Þetta hljómaði ekkert illa en svo hefur maður sest niður og hugsað málið, mér finnst ekki spennandi að slíta félagið í sundur“ sagði Vigfús og benti á að ótal mörgum spurningum væri enn ósvarað, þá helst varðandi aðstöðumál og yngri flokka starfsemi.

Ljóst er allavega að langur vegur er að stofnun nýs félags í Breiðholti, hugmyndin er ekki fullmótuð til útfærslu, ýmsir hnökrar eru enn sem þarf að slétta úr og margt fólk þarfnast sannfæringar, en vinnan er hafin og henni verður framhaldið.