Fær að mæta KR í úr­slitum þrátt fyrir hnefahöggið

Agravanis var rekinn úr húsi eftir að hafa kýlt Craig Moller í kviðinn í framlengingu leiksins í Smáranum í gær, sem Stjarnan endaði á að vinna 110-107.

Leikmaðurinn öflugi gæti því átt yfir höfði sér leikbann en það skýrist ekki fyrr en á næsta fundi aga- og úrskurðarnefndar.

Sú nefnd fundar jafnan í miðri viku og tekur þar fyrir brot sem átt hafa sér stað fram til miðnættis mánudaginn á undan. Það verður því ekki fyrr en í næstu viku sem það skýrist hvort Agravanis fær bann. Þetta staðfesti Hannes S. Jónsson, framkvæmdastjóri KKÍ, í samtali við Vísi.

Bikarúrslitaleikurinn er hins vegar á laugardaginn, klukkan 15, og Agravanis því frjálst að spila þar. Hannes segir ljóst að breyta þurfi reglugerðinni vilji menn koma í veg fyrir að þetta geti gerst.

Annað gildir í úrslitakeppninni

Þegar komið er fram í úrslitakeppnina í Bónus-deildunum fundar aganefndin hins vegar oftar og getur úrskurðað menn í bönn á milli leikja. „Í úrslitakeppni skal nefndin kvödd saman um leið og atvikaskýrsla/kæra berst. Skal nefndin kveða upp úrskurð í málinu svo fljótt sem auðið er. Ef um er ræða síðasta leik í deildarkeppni skulu sömu reglur gilda,“ segir í reglugerð.

Í reglugerð KKÍ um aga- og úrskurðarmál segir meðal annars, um uppkvaðningu úrskurða:

Aga- og úrskurðarnefnd skal kveða upp úrskurði á miðvikudögum og skulu þeir birtir á heimasíðu KKÍ. Almennt skulu öll mál sem borist hafa til skrifstofu KKÍ með sannarlegum hætti fyrir klukkan 00:00 á mánudögum á undan tekin fyrir. 

Úrskurðir nefndarinnar varðandi agamál taka almennt gildi klukkan 12:00 á hádegi næsta fimmtudag frá birtingu þeirra. Óheimilt er að taka út viðurlög í agamálum áður en úrskurðir taka gildi.

Í úrslitakeppni allra flokka taka úrskurðir í agamálum gildi um leið og þeir hafa verið birtir. Það sama gildir um atvik sem gerast í síðasta leik í deildarkeppni.