„Vitum hvernig Stjarnan spilar“

„Þetta var rosalegur leikur. Mér fannst við vera með undirtökin í fyrri hálfleik og til að byrja með í þeim seinni. Tindastóll er auðvitað rosalega gott lið og tókst að keyra upp ákefðina, sérstaklega varnarlega. Sóknarleikur okkar var því orðinn svolítið stirður hér undir lokin. Ég er virkilega sáttur með að okkur tókst að finna lausnir hér undir lokin og vinna þennan leik.“

KR leiddi nánast allan leikinn en þegar um þrjár mínútur voru eftir af leiknum komst Tindastóll yfir í fyrsta sinn í leiknum. 

Lokamínúturnar voru svakalegar þar sem KR tókst að tryggja sér sigurinn. Jakob segir að liðið hafi verið undirbúið undir að leikurinn myndi spilast eins og hann gerði og segist vera sáttur með hvernig liðið steig upp undir lokin.

„Við töluðum um það fyrir leikinn að í svona stórum leikjum gegn góðum liðum getur allt gerst. Þetta fer svolítið fram og til baka sem við vissum að myndi gerast. Við ræddum það að þegar það myndi gerast ætluðum við að halda okkar fókus og spila áfram sem eitt lið. Mér fannst okkur takast að gera það og ég er gríðarlega sáttur að við fórum ekki of mikið út úr okkar leik hér undir lokin.“

Stjarnan verið besta lið landsins

Eftir leiki kvöldsins er það ljóst að KR mætir Stjörnunni í úrslitum en Stjarnan vann Keflavík fyrr í kvöld eftir framlengdan leik. Þessi lið léku til úrslita í bikarnum árið 2009 og 2013 þar sem Stjarnan sigraði í bæði skiptin eftir spennandi viðureign en Jakob var sjálfur í liði KR árið 2009.

„Þessi leikur leggst rosalega vel í mig. Þetta verður gríðarlega erfitt verkefni en lið Stjörnunnar er búið að vera frábært frá áramótum og verið besta liðið landsins. Þetta verður gott verkefni fyrir okkur. Nú ætlum við að ná endurheimt og verða klárir fyrir leikinn á laugardaginn. Við vitum hvernig Stjarnan spilar, þeir eru mjög ákafir og eru á fullu allan tímann, þannig að við þurfum að vera klárir í það.“

Allir að koma með eitthvað að borðinu

KR hefur leikið afar vel það sem af er ári. Liðið er nú búið að vinna sex leiki í röð og hafa aðeins tapað einum leik frá áramótum en það var einmitt gegn Stjörnunni. Jakob segist vera afar ánægður með liðið en á sama tíma heldur hann sér og sínum mönnum á jörðinni og segir að liðið eigi meira inni.

„Ég er mjög ánægður með liðið og leikmennina. Þeir eru allir að koma með eitthvað mismunandi að borðinu. Mér finnst þeir vera að passa mjög vel saman þessa stundina og eru farnir að skilja hvorn annan betur og betur sem gerir það að verkum að þeir eru farnir að spila betur saman. Mér finnst við vera á uppleið en á sama tíma þá þurfum við að halda áfram þar sem við erum ekki alveg á þeim stað sem við viljum vera á og mér þykir við eiga meira inni.“