Víkingar keyptu Helenu af Val

Helena kemur til Víkings frá Val þar sem hún hefur verið síðustu tvær leiktíðir. Hún kom til Vals frá Breiðabliki eftir að hafa misst af allri leiktíðinni 2023, vegna krossbandsslita í hné. 

Helena, sem er 25 ára, er uppalin hjá FH en hefur einnig spilað með Fylki og svo Breiðabliki og Val.

Hún var í byrjunarliði Vals í sjö deildarleikjum á síðustu leiktíð en kom við sögu í 21 deildarleik, og skoraði eitt mark.

Ljóst er að Víkingar sjá fyrir sér að geta nýtt krafta Helenu betur en hún hefur á sínum ferli spilað 197 meistaraflokksleiki og skorað í þeim 39 mörk. Þá á hún að baki 23 leiki fyrir yngri landslið Íslands og skoraði í þeim fjögur mörk.

„Við erum mjög ánægð að fá Helenu í Hamingjuna. Helena er frábær sóknarmaður sem getur spilað allar 3 fremstu stöðurnar á vellinum og með góðan hægri fót. Hún passar vel inní hópinn okkar, leikmaður með reynslu en einnig með hungur í að gera betur,“ segir Einar Guðnason, þjálfari Víkinga, á heimasíðu félagsins.