Blikkaði blaða­menn eftir að hann sagði að allt yrði í lagi hjá sér í Super Bowl

Drake Maye, leikstjórnandi Patriots, meiddist á hægri kastöxlinni í úrslitaleik AFC-deildarinnar en hann sagðist hafa kastað sínum venjulega fjölda kasta á æfingu á mánudag og að batinn hefði tekið stakkaskiptum í aðdraganda Super Bowl LX gegn Seattle Seahawks.

„Mér líður vel. Það verður allt í lagi með mig,“ sagði Maye en blikkaði svo blaðamenn.

Maye tók takmarkaðan þátt í æfingu á fimmtudag og æfði svo ekki á föstudag vegna veikinda. Þegar hann talaði á opnunarhátíðinni í San Jose ráðstefnumiðstöðinni nefndi hann sunnudaginn sem vendipunkt, mögulega styrktan af fimmtán stiga hitanum í Kaliforníu sem tók á móti Patriots við komuna. Það hefur verið afar kalt síðustu daga á Austurrströndinn.

„Ég held að það hafi orðið vendipunktur þegar ég lenti – mér leið vel eftir flugið – og að kasta þarna úti í dag. Ég efaðist aldrei um að verða hundrað prósent klár fyrir leikinn. Þetta er Super Bowl, maður fær tvær vikur til að undirbúa sig. Maður gerir allt sem maður þarf til að ná sér góðum og ég er fullur sjálfstrausts og líður vel,“ sagði Maye og hreyfði hægri öxlina í hringi til að leggja áherslu á mál sitt.

Patriots héldu um níutíu mínútna æfingu í Stanford-háskóla á mánudag og Maye sagði að hann hefði kastað „talsvert mikið“. Hann sagðist hlakka til „venjulegrar undirbúningsviku“ á æfingum á miðvikudag, fimmtudag og föstudag.

Maye þakkaði sjúkraþjálfarateymi Patriots, undir forystu Jim Whalen, fyrir aðstoðina við batann.

Hann bætti við að hann væri búinn að ná sér af veikindunum sem héldu honum frá æfingu á föstudag og sagðist hafa mætt seinna til að horfa á æfinguna þann dag eftir að fréttamenn voru farnir.

„Það er kalt þarna úti, það gekk einhver pest í búningsklefanum, en mér líður virkilega vel,“ sagði Maye sem er að fara að taka þátt í sinum fyrsta Super Bowl.

Super Bowl verður í beinni útsendingu á Sýn Sport á sunnudaginn kemur. Lokasóknin er auk þess á dagskránni í kvöld þar sem hitað verður vel upp fyrir leikinn. Útsendingin á sunnudaginn hefst líka vel í tíma fyrir leik til að hægt sé að fara vel yfir allt sem skiptir máli fyrir stærsta leik ársins í bandarískum íþróttum.