„Við erum á öldunni okkar núna og erum að njóta þess“

„Virkilega góður sigur en á sama tíma virkilega erfiður sigur á móti vel skipulögðu liði ÍR. Þeirra einkenni er góður varnarleikur og keyra hratt upp völlinn og það eru fá lið í deildinni sem að gera þetta jafn vel og ÍR liðið. Við þurftum því að hafa virkilega mikið fyrir þessu hér í dag,“ sagði Magnús Stefánsson, þjálfari ÍBV, eftir sjöunda sigur liðsins í röð í deildinni.

„Stelpurnar gerðu það sem þurfti til þess að sækja þennan sigur og ég er ofboðslega ánægður með nálgunina hjá þeim inn í þennan leik. Mér fannst þær ekki bogna eða brotna, fókusinn þeirra var á réttum stað.“

Góð stemning í hópnum er sýnileg og ljóst að það hafi áhrif á frammistöðu leikmanna.

„Fyrst og síðast eru það þessir leikmenn og þessar stelpur. Þær eru að leggja ofboðslega mikla vinnu á sig á hverjum einasta degi og í hverri einustu viku. Þær eru að njóta þess að spila handbolta og stemningin í hópnum er frábær, skiptir ekki máli hvort það sé elsti leikmaðurinn eða yngsti. Það er alltaf sama grínið í gangi í kringum æfingar og í kringum þessar ferðir.“

„Við erum á öldunni okkar núna og erum að njóta þess á meðan það er svoleiðis.“

ÍBV hafnaði í 6. sæti á síðustu leiktíð en liðið hefur nú unnið sjö leiki í röð og eru á þvílíkri siglingu. Aðspurður hvort markmiðið væri að vinna deildina að þá var svarið einfalt.

„Algjörlega, það væri skrítið að segja eitthvað annað vegna þess að við erum í fyrsta sæti ásamt Val. Valur er náttúrulega með frábært lið og tvo menn í hverri einustu stöðu. Svarið við spurningunni er þó einfalt já að sjálfsögðu ætlum við að halda okkur þarna eins lengi og við getum.“