Á leið á Ólympíu­leikana ári eftir að hann missti báða for­eldra sína í flug­slysi

Naumov hefur formlega verið valinn í ólympíuliðið aðeins einu ári eftir að foreldrar hans og 65 aðrir létust í flugslysi American Airlines í Washington DC.

Naumov fór úr því að vita ekki hvort hann myndi nokkurn tíma skauta aftur í febrúar á síðasta ári yfir í að ná ævilöngu markmiði sínu í íþróttinni ári síðar.

Foreldrarnir voru heimsmeistarar

Foreldrar listskautarans voru heimsmeistarar í paraskautum árið 1994, þau Evgenia „Zhenya“ Shishkova og Vadim Naumo. Í gær var hann tilkynntur sem einn af þremur körlum sem keppa fyrir hönd Bandaríkjanna á komandi leikum.

Auk Naumov tryggðu Ilia Malinin og Andrew Torgashev sér einnig sæti í karlaliðinu.

„Við gerðum það,“ sagði Naumov við áhorfendur á bandaríska meistaramótinu í listskautum eftir tilkynninguna.

Síðan hann var fimm ára

„Á hverjum degi, ár eftir ár, ræddum við [foreldrar mínir og ég] um Ólympíuleikana. Þetta var eitthvað sem mig hefur langað að upplifa í síðan ég var fimm ára,“ sagði Naumov.

Þremur dögum áður en hann var valinn í liðið skautaði Naumov stutta prógrammið sitt og brast í grát þegar hann fékk einkunnina sína, á meðan hann hélt á mynd af sér sem þriggja ára dreng ásamt foreldrum sínum.

Flugvélin rakst á þyrlu bandaríska hersins

„Að deila þessari viðkvæmni með áhorfendum og finna orku þeirra á móti er eitthvað sem ég mun muna alla ævi,“ sagði Maxim Naumov þá við fréttamenn.

Naumov missti foreldra sína, sem einnig voru þjálfarar hans, þann 29. janúar þegar flug 5342 frá American Airlines rakst á Black Hawk-þyrlu bandaríska hersins í Washington D.C. Af þeim 67 sem létust voru 28 úr listskautasamfélaginu.

Margir skautarar, ásamt foreldrum Naumovs, voru á leið aftur til Washington D.C. eftir að hafa sótt þróunarbúðir bandaríska listskautasambandsins í Wichita í Kansas-fylki. Naumov hafði einnig verið í Wichita og endaði í fjórða sæti í keppni eldri karla á bandaríska meistaramótinu þann 26. janúar, aðeins dögum fyrir andlát foreldra sinna.

Voru hjá honum allan sólarhringinn

Eftir slysið sagði Ekaterina „Katia“ Gordeeva, rússneskur liðsfélagi Zhenya og Vadim Naumov á Ólympíuleikunum 1994 og vinkona hjónanna, að fjölskylduvinur væri hjá Maxim „allan sólarhringinn“. Katia sagði að fjölskylduvinurinn sem styddi hann „er eins og guðmóðir hans, og hún er hjá honum núna ásamt eiginmanni sínum.“

Zhenya og Vadim kepptu ásamt Katiu og látnum eiginmanni hennar, Sergei Grinkov, á Ólympíuleikunum 1994, þar sem þau enduðu í fjórða sæti. Þau giftu sig árið 1995 og hættu keppni árið 1998 til að skauta sem atvinnumenn og fluttu til Simsbury, þar sem þau eignuðust síðar son sinn.

Um tíma eftir andlát þeirra efaðist Naumov um hvort hann myndi yfirhöfuð reyna að komast í ólympíuliðið en hann skipti um skoðun, aðallega vegna þess hvað það þýddi fyrir foreldra hans.

Eitt af síðustu samtölunum

„Það er lokatakmarkið,“ sagði Naumov á fimmtudag við Associated Press. „Það er það sem foreldrar mínir og ég – eitt af síðustu samtölum okkar var einmitt um það, og þú veist, það myndi þýða allt fyrir mig að gera það. Þannig að það er það sem við erum að berjast fyrir,“ sagði Naumov.

Hér fyrir neðan má sjá tilfinningarnar hellast yfir hann þegar hann fékk að vita að hann væri á leið á leikana.