Luke „the Nuke“ Littler í úr­slita­leikinn þriðja árið í röð

Littler vann leikinn 6-1 í settum en Searle hafði aðeins tapað tveimur settum allt mótið fyrir leik þeirra í kvöld.

Leikurinn byrjaði þó ekki vel fyrir hinn unga Littler því Searle vann fyrsta settið og komst í 1-0 en Littler svaraði tapi í fyrsta settinum með því að vinna næstu sex sett með sannfærandi hætti. Þar með var hann kominn í úrslitaleikinn.

Þetta er eins og áður sagði þriðji úrslitaleikur Littler á þremur árum en hann vann heimsmeistaratitilinn í fyrra eftir að hafa tapað í úrslitaleiknum árið á undan.

„Var ekki sáttur“

 „Ég lenti 1-0 undir og var ekki sáttur. Mér fannst ég ekki spila nógu vel því allir vita að ég vil komast í 1-0,“ sagði Luke Littler, í samtali við Sky Sports eftir sigurinn.

„Ryan á stórt hrós skilið því hann stóð sig frábærlega á þessu móti. Hann getur verið stoltur en við höldum áfram á morgun,“ sagði Littler.

Littler var nokkrum sinnum nálægt því að ná níu pílna leik: „Þetta var hræðileg fyrsta píla! En já, einn leikur eftir, ég reyni aftur á morgun,“ sagði Littler.

„Þetta verður frábær leikur“

En hvort vill hann mæta Gian van Veen eða Gary Anderson?: „Þetta verður frábær leikur. Mér er sama við hvorn ég spila. Þeir eru báðir góðir strákar en já, sá sem hittir tvöföldu reitina sína fyrst vinnur þann leik,“ sagði Littler.

Þetta verður fjórtándi úrslitaleikur Littler á stóru sjónvarpsmóti og því er hann að ná fyrir nítján ára afmælið sem er 21. janúar næstkomandi.

Það kemur svo í ljós seinna í kvöld hver verður andstæðingur táningsins í úrslitaleiknum annað kvöld því í seinni undanúrslitaleiknum mætast Gian van Veen og Gary Anderson.