Í bann fyrir að kasta flösku í barn

Eftir að leikmaður hans Malik Mack klikkaði á þriggja stiga skoti um leið og leiktíminn rann út í 80-77 tapi liðsins gegn Xavier á laugardag í Washington, kreisti Cooley vatnsflösku og kastaði henni í átt að áhorfendapöllunum. Flaskan lenti í barni sem kona hélt á, nokkrum röðum fyrir aftan bekk liðsins.

Verður í banni í næsta leik

Cooley baðst strax afsökunar eftir leikinn og sagðist ætla að hafa samband við fjölskylduna. Samkvæmt skólanum verður hann í banni í næsta leik liðsins gegn Coppin State og Jeff Battle, aðstoðarþjálfari, mun stýra liðinu í fjarveru Cooley.

Í yfirlýsingunni sagði Lee Reed, íþróttastjóri Georgetown, að hegðun Cooley uppfyllti ekki kröfur skólans.

„Ég fundaði með Cooley þjálfara í dag til að ræða atvikið sem átti sér stað eftir leikinn í gærkvöldi gegn Xavier,“ sagði Reed. 

„Ég lýsti því yfir að hegðun hans væri ekki í samræmi við þær kröfur sem við gerum til þjálfara okkar, né endurspeglaði hún gildi íþróttadeildar Georgetown eða Georgetown-háskóla. Fyrir vikið verður Cooley þjálfari í banni í næsta leik gegn Coppin State,“ sagði Lee Reed.

Big East-deildin studdi ákvörðun skólans í eigin yfirlýsingu á sunnudag.

Styðjum ákvörðun þeirra

„Við höfum átt í samskiptum við stjórnendur Georgetown og styðjum ákvörðun þeirra um að setja Ed Cooley, aðalþjálfara karlaliðsins í körfubolta, í bann fyrir gjörðir sínar eftir leikinn í gærkvöldi gegn Xavier,“ sagði í yfirlýsingu deildarinnar. 

„Öryggi áhorfenda og þátttakenda á viðburðum Big East er afar mikilvægt og grundvallaratriði fyrir ánægjuna af leikjum okkar.“

Tapið var það fjórða hjá Georgetown í síðustu sjö leikjum. Á sunnudag baðst Cooley aftur afsökunar í yfirlýsingu eftir að leikbannið var tilkynnt. Hann sagðist einnig vera náinn fjölskyldu barnsins sem varð fyrir vatnsflöskunni.

Ég biðst innilega afsökunar

„Ég biðst innilega afsökunar á gjörðum mínum í leiknum í gærkvöldi og bið Nyahkoon-fjölskylduna, sem ég hef þekkt í mörg ár og lít á sem mína eigin fjölskyldu, innilegrar afsökunar,“ sagði Cooley. 

„Hegðun mín var óásættanleg og endurspeglar ekki hver ég er eða þann leiðtoga sem ég leitast við að vera. Ég vil einnig biðja Georgetown-samfélagið, liðið, stuðningsmenn, deildina og fjölskyldu mína afsökunar. Ég tek fulla ábyrgð á gjörðum mínum og afleiðingum þeirra. Ég mun læra af þessari reynslu til að tryggja að þetta gerist aldrei aftur.“