Stór­stjarna úr WNBA-deildinni í heim­sókn á Ís­landi

Ogwumike er 35 ára gömul, 188 sentímetrar á hæð og núverandi leikmaður Seattle Storm. Hún hefur leikið í deildinni frá 2012 og var formaður leikmannasamtakanna í sex ár frá 2016 til 2022.

Ogwumike var mjög hrifin af Íslandi ef marka má samfélagsmiðla og þar mátti sjá myndir frá ferðum hennar um íslenska náttúru.

Árið 2016 varð hún bæði WNBA-meistari með Los Angeles Sparks sem og kosin mikilvægasti leikmaður WNBA-deildarinnar.

Hún var kosin nýliði ársins á sínum tíma og hefur verið tíu sinnum valin í stjörnuleikinn og átta sinnum í fyrsta (1) eða annað (7) úrvalslið deildarinnar.

Á ferli sínum í WNBA er Ogwumike með 16,7 stig, 7,5 fráköst og 2,1 stoðsendingu að meðaltali í 436 leikjum. Hún hefur skorað 14,6 stig að meðaltali í leik í 40 leikjum í úrslitakeppni.

Ogwumike hefur einnig unnið EuroLeague með Dynamo Kursk og pólsku deildina með CCC Polkowice.

Hún var valin ein af 25 bestu leikmönnum í sögu WNBA á 25 ára afmæli deildarinnar árið 2021.

Ogwumike hefur einnig tvisvar orðið heimsmeistari með bandaríska landsliðinu en hún hætti að spila með landsliðinu árið 2020 og reyndi að fá leyfi FIBA til að spila fyrir Nigeríu. Það gekk ekki eftir þrátt fyrir að hún hafi sótt þrisvar sinnum um það.