Sex hundruð miðar á vett­vangi morðsins: „Fokking hálf­vita fífl bæði tvö!!!!“

Þetta er meðal þess sem kemur fram í dómi Héraðsdóms Reykjaness, sem dæmdi Margréti Höllu í 16 ára fangelsi í gær fyrir að verða föður sínum að bana og fyrir stórfellda líkamsárás gagnvart móður sinni.

Í dóminum segir að við vettvangsrannsókn á heimili fjölskyldunnar hafi fundist fjöldi handskrifaðra blaða, sem hafi vakið athygli rannsóknarlögreglumanna.

Harðar og óvægnar orðsendingar

Haft er eftir skýrslu lögreglumanns að um hafi verið að ræða orðasendingar milli Margrétar Höllu og foreldra hennar, sem hafi fundist í eldhúsi, stofu, hjónaherbergi, skrifstofu og holi hússins.

„Skýrslunni fylgja um 600 orðsendingar. Þær eru meira og minna ódagsettar og ekki í tímaröð, en í skýrslunni er greint á milli orðsendinga frá hverjum heimilismanna fyrir sig. Orðsendingar frá ákærðu til foreldra sinna eru oft á tíðum harðar og óvægnar og svör foreldranna mörg hver í bænar- og afsökunartón,“ segir í dóminum.

Vildi ekki að móðirin vissi um ferðir hennar

Þá segir að í dæmaskyni megi nefna eftirfarandi skilaboð frá Margréti Höllu til föður síns:

• „Mamma frekja og tillitslausa sjálfselska helvíti verður að vera komin heim á bílnum kl. hálf 1 !!!!“
• „EKKI segja mömmu hvert við erum að fara ... það kemur tíkinni ekki fokkings við !!!!!!“ 

Hún hafi beint svohljóðandi skilaboðum til annað hvort föður eða móður: 

• „Og getur þú DRULLAÐ þér að fara eftir einu og öllu sem stendur á miðanum helvítið þitt !!!!!! OG svo skaltu grjóthalda kjafti á morgun og passa að ég vakni ekki við neitt sem þú ert að gera ógeðið þitt !!!!!!“ 
• „FOKKING HÁLFVITA FÍFL BÆÐI TVÖ !!!!“ 

Þá segir að mörg skilaboða Margrétar Höllu tengist aðstoð foreldra hennar við umönnun hesta. 

Loks segir um miðana á heimili fjölskyldunnar að meðal þeirra hafi verið nokkur fjöldi minnisblaða frá föður Margrétar Höllu. „Bera sum þessara blaða dagsetningar án ártals og fjögur eru fyllilega tímasett; „„26.10.22“, „17/11-22“, „17/2-24“ og „5/6-24“.“

Viðkvæm fyrir hljóðum

Í dómnum kemur fram að Margrét Halla hafi leitað til heyrnarfræðings vegna eyrnasuðs og hljóðþols sem hún hafi fyrst fundið fyrir 2019 og svo farið versnandi. Heyrnarfræðinginn hafi byrjað að gruna 2023 að hún væri með svokallaða hljóðóbeit (misophonia) fremur en hljóðóþol, og að einstaklingur sem þjáist af slíkri röskun hafi skert þol fyrir ákveðnum hljóðum, upplifi þau sem pirrandi og jafnvel yfirþyrmandi áreiti og fylgi því oft mikil kvíðatilfinning og jafnvel reiði. 

Í hennar tilfelli hafi virst sem kveikjuhljóð tengdust foreldrum hennar og hún hafi upplifað mikinn kvíða og stress.