Stórar breytingar og tíma­mót hjá Red Bull

Um tímamót er því að ræða bæði hjá Marko og Red Bull Racing en hann hefur verið mikilvægur hlekkur í sigursælli sögu liðsins allt frá stofnun þess árið 2005. 

Á sínum tíma hjá Red Bull Racing hefur liðinu tekist að vinna sex heimsmeistaratitla bílasmiða í Formúlu 1 mótaröðinni og þá hafa ökumenn liðsins átta sinnum orðið heimsmeistarar. 

Marko, sem er 82 ára gamall, var lýst á sínum tíma sem eins konar hægri hönd hins sáluga Dietrich Mateschitz, eins af eigendum Red Bull samstæðunnar og hefur tekið þátt í að þróa ökumenn liðsins en þeirra á meðal eru fjórföldu heimsmeistararnir Sebastian Vettel og Max Verstappen. 

Sjálfur á Marko að baki feril sem ökumaður í Formúlu 1 en þurfti að gefa þann feril upp á bátinn aðeins 29 ára gamall eftir að hafa slasast í keppni árið 1972. 

Í yfirlýsingu frá Marko segir hann að niðurstaðan á nýafstöðnu tímabili, þar sem að Max Verstappen, ökumaður Red Bull Racing, rétt missti af sínum fimmta heimsmeistaratitli eftir hetjulega endurkomu. hafi haft mikil áhrif á sig. 

„Mér er það ljóst að nú sé tímapunkturinn réttur fyrir mig til þess að binda enda á þennan langa en jafnframt farsæla feril.“

Brotthvarf Marko eru ekki einu stóru breytingarnar sem hafa átt sér stað hjá Red Bull Racing liðinu. Fyrr á árinu var Christian Horner, þáverandi liðsstjóri liðsins látinn fara en sá hafði verið liðsstjóri öll þau tímabil sem Red Bull Racing stóð uppi sem heimsmeistari.