Alexander vann úrvalsdeildina: „Ég stefni á Ally Pally! Ég er ekki búinn hérna“

Gríðarleg stemning var á Snorrabrautinni þar sem mikill fjöldi fólks mætti til að styðja sína menn.

Alexander byrjaði betur og vann fyrsta settið 3-1 og þar með kominn 1-0 yfir í settum á meðan Hallgrímur virtist ekki finna sig eftir fyrstu leggina. Alexander vann einnig annað settið nokkuð þægilega og virtist hreinlega ætla að sópa leið sína að titlinum.

Halli svaraði þó fyrir sig í þriðja settinu, reynslan sýndi sig, og 3-1 sigur í því setti þýddi að staðan var orðin 2-1. Báðir voru þá farnir að hitna og fór fjórða settið alla leið í oddalegg þar sem báðir voru komnir í útskot.

Þá kom smá stress í menn og náði Halli á endanum að loka tvöföldum 16 og tryggja sér oddasett um titilinn. Orkan var gríðarleg í húsinu og spennan sérlega mikil þegar að fimmta og síðasta setti kvöldsins var komið.

Í oddasetti í úrslitaleik þarf að vinna settið með tveimur leggjum og framan af stefndi allt í bráðabana.

Halli Egils náði ekki að taka út 32 til að koma sér í 1-0 og Alexander refsaði fyrir þau mistök. Hann vann fyrsta legg gegn kasti. Halli svaraði í legg 2 með að vinna hann gegn kasti og jafnaði oddasettið.

Í þriðja legg náði Alexander enn og aftur að vinna gegn kasti og koma sér í 2-1 og þurfti þá aðeins einn legg í viðbót til að verða meistari.

Töffaraskapur í síðasta leggnum

Alexander byrjaði fjórða legginn ekki vel og gerði aðeins 29 á meðan Halli gerði 125 á móti og stefndi í bráðabana.

Þá steig Alexander upp og setti í 180. Hann fékk 96, 100 og 78 næstu þrjár heimsóknir og skildi Halla eftir í reyk, staðan 178-18.

Fólk á svæðinu var visst um að Alexander myndi fara þægilegu leiðina til að tryggja sér titilinn með því að splitta 18 og eiga þannig þægilegri leið að útskoti. Hann var ekki á þeim buxunum og tók út 18 með því að kasta í tvöfaldan níu og tryggja sér þannig Úrvalsdeildartitilinn 2025. Óhætt er að segja að allt hafi farið á hvolf í húsinu.

Stefnir hærra

Alexander var tekinn tali af Andra Má Eggertssyni eftir að sigurinn var í höfn á Bullseye í gær og tilfinninganar eðlilega miklar.

„Ég held ég hafi logið í gær þegar ég sagði að þetta væri ekki neitt, meinti ekki neitt. Það er aðeins öðruvísi tilfinning þegar bikarinn er kominn í hendurnar,“ segir Alexander.

Hvað fannst þér standa upp úr her í kvöld?

„Bara crowdið, djöfull var þetta flott báðu megin, sérstaklega mín megin, liðið að mæta styðja mig, fjölskyldan, vinir, bara allir,“ segir Alexander sem spilar einnig með körfuboltaliði Grindavíkur sem var mætt að styðja við bakið á honum.

„Það er aðeins skemmtilegra að hafa DeAndre Kane hvetja sig í pílu en körfubolta,“ segir hann léttur.

Segðu okkur frá þessu lokaútskoti.

„Ég var að hugsa um að splitta 18 að fara í sex eða 10 en hugsaði bara og afsakið orðbragðið bara fokk it ég klára þetta.“ segir Alexander sem hefur átt gott ár og ætlar að loka því á heimsókn á HM í pílukasti.

„Búið að vera mjög gott ár hjá mér þetta er 5 eða 6 stóri titilinn sem ég tek á þessu ári og svo toppum við bara þetta með að fara í Ally Pally yfir jólin,“ segir Alexander sem stefnir á að vera uppi á sviði í Alexandra Palace frekar en í stúkunni áður en langt er um liðið.

„Ég stefni á Ally Pally! Ég er ekki búinn hérna.“