Knattspyrnukona í Íslendingaliðinu hreinsuð af öllum á­sökunum

Þetta voru góðar fréttir fyrir Vålerenga sem varð norskur bikarmeistari um síðustu helgi. Sædís Rún Heiðarsdóttir og Arna Eiríksdóttir spila báðar með liðinu en Arna var þó enn í FH þegar málið kom upp.

Þetta kemur fram á heimasíðu norsku lyfjaeftirlitsstofnunarinnar. Leifar af efninu dímetýlbútýlamíni (DMBA) fundust hjá átta leikmönnum eftir leik LSK Kvinner og Vålerenga í efstu deild kvenna þann 22. apríl á þessu ári.

Einn leikmaður var með gildi yfir leyfilegum mörkum. Ástæðan fyrir jákvæða lyfjaprófinu var gúmmíkurl í íþróttahúsinu.

„Við teljum að íþróttamaðurinn hafi ekki getað séð fyrir möguleikann á að innbyrða ólöglega efnið með því að spila á gervigrasvöllum. Með það að leiðarljósi gefur regluverkið færi á að taka ákvörðun sem leiðir ekki til þess að íþróttamaðurinn verði útilokaður frá íþróttum,“ sagði Håvard Kampen, formaður ákærunefndarinnar.

DMBA er örvandi efni sem er bannað í keppni.

Eftir að málið kom upp var bannað að spila leiki inni í Lilleström-höllinni og Norðmenn hafa nú hafið átak sem á að losa alla gervigrasvelli landsins við umrætt gúmmíkurl.