Þarf að græja pössun

Sandra segir æfingar liðsins hafa gengið nokkuð vel þó veikindi og meiðsli hafi einhver áhrif haft á undirbúning. Valskonurnar Thea Imani Sturludóttir og Hafdís Renötudóttir hafa verið veikar og meiðsli aftra Andreu Jacobsen og Elísu Elíasdóttur.

Breytingar hafa orðið á leikmannahópi Íslands þar sem reynsluboltar sem hjálpuðu liðinu að komast á mótið eru hættir. Óreyndara lið tapaði fyrstu tveimur leikjum sínum í forkeppni EM í vetur, fyrir Færeyjum og Portúgal.

„Ég vona að þeir leikir hafi gefið okkur reynslu. Það er alltaf erfitt að spila þessa fyrstu landsleiki, fyrir þessar nýju. Vonandi er það farið núna. Það vantaði smá baráttu í okkur og einhverjar sem höfðu aldrei spilað saman í vörninni hafa þá núna spilað tveimur fleiri leikjum en áður. Vonandi kemur þetta hægt og rólega,“ segir Sandra.

Sandra fékk fyrirliðabandið og mun leiða Ísland á mótið. Finnur hún til aukinnar ábyrgðar í nýju hlutverki?

„Já, klárlega. Hvort sem það væri með fyrirliðabandið eða án þess þá er maður kominn í eldri hlutann þó maður sé bara 27 ára. Því fylgir ósjálfrátt ákveðin ábyrgð, sérstaklega hjá þeim sem hafa farið á HM áður, að miðla reynslu til hinna og minna þær á að hafa gaman og skemmta sér,“ segir Sandra.

Ertu mjög meðvituð um að vera með bandið og er nálgunin eitthvað öðruvísi?

„Nei, í rauninni ekki. Ég er ótrúlega þakklát fyrir að vera að fara. Ég fór síðast áður en ég varð ólétt og var svo ekki með á EM. Ég er ótrúlega spennt og þakklát að vera á leiðinni aftur á stórmót,“ segir Sandra sem fór á HM 2023 en missti af EM í fyrra vegna barneigna.

„Maður þarf að minna sig á það líka hvað maður var svekktur fyrir EM og taka það með sér núna þegar maður fer á HM. Svo eru þetta praktískir hlutir núna, hver á að passa og svona, sem maður er núna að spá í,“ segir Sandra.

Fleira kemur fram í viðtalinu við Söndru sem má sjá í heild að neðan.