Varð sá há­vaxnasti í sögunni

Hinn nítján ára gamli Rioux er nýnemi í skólanum en hann er 236 sentimetra hár. Hann kom inn á í 104-64 sigri Florida Gators á North Florida í nótt.

Rioux, sem er frá Montreal í Kanada, kom inn á þegar rúmar tvær mínútur voru eftir af leiknum. Hann sló þar með met 231 sentimetra hárra leikmanna, þeirra Kenny George frá UNC Asheville og Mike Lanier frá Hardin-Simmons/UCLA.

„Þetta var frábær tilfinning. Stuðningurinn frá öllum var ótrúlegur, bæði á bekknum og frá áhorfendum. Allir studdu mig og ég er mjög þakklátur,“ sagði Rioux eftir leikinn

Þegar lið hans var með 24 stiga forystu í hálfleik sagði Todd Golden, þjálfari Florida, við leikmenn sína að hann vildi setja nokkra af þeim yngri inn á, þar á meðal Rioux. Það var ekki bara staðan í hálfleik sem var hvatning til að setja hann inn á.

„Fólk var að hrópa á mig í hálfleik um að láta hann spila,“ sagði Golden í gríni eftir leikinn. „Ég sagði, heyrið mig, það mun gerast, tíminn mun koma. Ég get verið þrjóskur. Ég tek ekki vel við fyrirmælum, þannig að þegar þau eru að hrópa á mig að gera það, ja, kannski bíð ég aðeins lengur.“

Eftir því sem forysta Gators jókst vissi Golden að tíminn væri kominn.

„Hann hefur lagt mikið á sig og honum til hróss hefur hann haldið góðu viðhorfi án þess að fá mikla umbun í formi spilatíma og tækifæra. Hann fór inn í þetta ár vitandi að svo yrði staðan,“ sagði Golden

Rioux var þegar orðinn methafi fyrir fimmtudaginn, en hann var opinberlega útnefndur hávaxnasti táningur heims af Heimsmetabók Guinness. Á æviágripasíðu sinni segir hann: „Við erum enn ekki hundrað prósent viss um af hverju ég er svona hár – eftir rannsókn gátu læknar aðeins útskýrt það með erfðum fjölskyldu minnar. Faðir minn er 203 cm, móðir mín er 188 cm og eldri bróðir minn er 206 cm. Þannig að við erum frekar hávaxin fjölskylda.“