„Þurfum að fara átta okkur á því hversu góðir við erum í körfu­bolta“

„Það er mjög jákvætt. Þetta snýst um að sigra leiki og við höfum verið grátlega nálægt því að vinna leiki“ sagði Ægir Þór Steinarsson fyrirliði Stjörnunnar eftir sigurinn í kvöld.

„Fínt svar hérna í dag frá síðasta leik. Við misstum þetta náttúrulega niður í þriðja leikhluta og okkur langaði í þennan sigur og ég held að stoppin hérna í lokin hafi verið mjög mikilvæg og við vorum kaldir á línunni“

Stjarnan var fimmtán stigum yfir eftir fyrri hálfleikinn en misstu leikinn niður í jafnan leik í þriðja leikhluta.

„Þeir sóttu þetta bara. Þeir skoruðu bara í hvert einasta skipti og fundu einhverjar lausnir á varnarleiknum og voru bara mjög fastir fyrir sem er bara mjög vel gert hjá þeim“

„Þeir eru náttúrulega með góð gæði en við náðum að svara því áhlaupi fannst mér bara ágætlega og vorum með tökin á þessum leik“

Stjarnan voru flottir í fyrri hálfleik og skoruðu 61 stig og það var virkilega sterkt að klára þennan leik þrátt fyrir áhlaup Njarðvíkinga í seinni hálfleik.

„Sýnir bara styrk, sýnir bara að við þurfum að fara átta okkur á því hversu góðir við erum í körfubolta. Um leið og við förum að gera það þá halda sigurleikirnir áfram að koma“

Sigur Stjörnumanna vannst á því að vera kaldir í lokin að mati Ægis Þórs.

„Sigurinnn vannst bara á því að vera kaldir á því hérna í lokin. Þeir koma til baka og þannig orsakast leikurinn en við tókum góðar ákvarðanir í lokin að mestu leyti. Við náðum stoppum þegar við þurftum að stoppa og það gaf okkur sigurinn“

Þrátt fyrir góðan sigur í kvöld er ýmislegt hægt að taka úr þessum leik.

„Það er margt jákvætt en hins vegar fannst mér varnarleikurinn vera drullu slappur sérstaklega hérna í seinni hálfleik og það er bara eitthvað sem að við lögum“ sagði Ægir Þór Steinarsson í lokin.