Vesturbæjarlaug opnuð enn eina ferðina eftir við­gerðir

„Laugarkarið var háþrýstiþvegið til að fjarlægja lausa málningu og sýni tekin til að hægt sé að greina hvað veldur flögnun. Að því loknu var blettum lokað með nýrri málningu,“ segir í tilkynningu frá Reykjavíkurborg. 

Einungis til bráðabirgða

Um bráðabirgðaviðgerð er að ræða og vonast til að hún dugi fram að næsta sumri þegar hægt verður að vinna að varanlegri lausn, að sögn borgarinnar.

Vesturbæjarlaug hefur ítrekað verið lokað eftir viðhaldsframkvæmdirnar í sumar. Tilgangur þeirra var að bæta aðstöðu gesta og endurnýja gamlar laugar og mannvirki. Framkvæmdalokum var endurtekið frestað og fljótlega eftir opnun fór að bera á málningarflögum í lauginni.  

Lauginni hefur verið lokað fjórum sinnum undanfarna mánuði. Fyrst 26. maí vegna viðhaldsframkvæmdanna sem drógust síðan á langinn og var hún opnuð aftur 19. júní. Vesturbæjarlaug var svo aftur lokað 18. ágúst en opnuð viku seinna.

Næst þurfti að loka lauginni í sólarhring 29. ágúst. Eftir það var hún opin gestum fram að 13. október þegar ákveðið var að ráðast í núgildandi lokun.