Verstappen telur sig ekki geta barist um titilinn

Runólfur Trausti Þórhallsson skrifar 28. október 2025 20:03

Telur ekki líklegt að hann stundi uppi sem heimsmeistari í fimmta sinn. EPA/José Méndez

Þó hinn margfaldi heimsmeistari Max Verstappen hafi saxað á forystu Lando Norris í stigakeppni ökumanna í Formúlu 1 þá efast Hollendingurinn um að það sé nóg til að geta barist við Norris og kollega hans Oscar Piastri um heimsmeistaratitilinn.

Verstappen, sem keyrir fyrir Red Bull, hefur minnkað bilið úr 104 stigum í aðeins 36 stig. Ökumaðurinn var hins óánægður með að ná aðeins 3. sæti í Mexíkó borg um liðna helgi þar sem honum og Lewis Hamilton hjá Ferrari lenti saman.

Eftir sigur í Austurríki var Verstappen viss um að hann gæti náð ökumönnum McLaren en eftir kappakstur helgarinnar er komið annað hljóð í kappann.

„Ég tapaði tíu stigum til Lando, eins og ég sagði fyrir helgi þarf allt að ganga upp svo ég geti unnið titilinn. Það var ekki svo um helgina, svo það er svarið mitt til ykkar. Þetta verður erfitt en sjáum til hvað ég gert á hinum brautunum.“

„Ég vona auðvitað að við upplifum ekki helgi sem þessa aftur en þetta sýnir engu að síður að við erum ekki nægilega hraðir í ákveðnum aðstæðum. Við þurfum að mínu mati að skilja það aðeins betur.“

Þegar fjórar keppnir eru eftir af F1 tímabilinu er Norris efstu ökumanna með 357 stig. Piastri er aðeins stigi á eftir á meðan Verstappen er með 321 stig í 3. sætinu.

Akstursíþróttir