430 sunn­lenskir grunn­skóla­kennarar funduðu á Flúðum

Um 430 grunnskólakennarar af öllu Suðurlandi sóttu haustþingið á fimmtudaginn og föstudaginn á Flúðum en þar var m.a. boðið upp á fjölbreyttar kynningar úr skólastarfi og 25 fjölbreytta fyrirlestra.

„Fyrir utan það vorum við með viðburð, sem við köllum „Líttu þér nær“ þar sem kennarar deila skemmtilegum verkefnum hver með öðrum og ég huga að við séum með svona 50 atriði til sýnis hérna inni“, segir Kolbrún Guðmundsdóttir, formaður Kennarafélags Suðurlands og kennari í Sunnulækjarskóla á Selfossi.

Hvað er svona mest inn eins og sagt er í skólastarfinu í dag?

„Við erum mikið að fjalla um gervigreind, netöryggi og skapandi verkefni held ég bara“.

Gervigreindin, hvernig líst þér á hana í skólastarfinu?

„Vel en við verðum að vanda innleiðingu, það er okkar verkefni þessa dagana, kunna að nota hana,“ segir Kolbrún.

Talandi um gervigreind þá var Björn Kristjánsson verkefnisstjóri með mjög áhugaverðan fyrirlestur um þann þátt í skólastarfi, kosti og galla greindarinnar.

En símanotkun nemenda í skólanum, hvað vill Kolbrún gera í því?

Þá held ég að við verðum að stýra aðgenginu”, segir hún.

En viltu banna síma í skólum?

„Ég veit það ekki, ég get ekki svarað því en það hefur virkað vel í þeim skóla, sem ég hef verið í að vera með símabann. Við höfum séð öðruvísi félagsleg samskipti og aukin félagsleg samskipti.”

Hvernig er að vera kennari í dag?

„Það er eitt besta starf í heimi af því að við fáum að vera með ungmennum og flottu fólki alla daga,” segir Kolbrún.