„Hef engar upp­lýsingar um að eitt­hvað óeðli­legt hafi átt sér stað“

Lífeyrissjóðurinn Birta var í hópi stærstu hluthafa Play og fjárfesting félagsins í flugfélaginu nam um 1,7 milljörðum króna. Ólafur Sigurðsson framkvæmdastjóri Birtu segir það hlutverk skiptastjóra að gefa skýringar á gjaldþrotinu í fyllingu tímans, Play hafi einfaldlega ekki verið gjaldfært.

„Það dettur engum í hug að fara með fyrirtæki í gjaldþrot nema af því að það ekki hægt að greiða, þetta er skráð fyrirtæki þannig að það er ekki annað hægt ef að það er ekki hægt að greiða þá þurfi að tilkynna það inn á markaðinn og fara svo til sýslumanns eins og gert var. Auðvitað kom þetta okkur á óvart eins og öðrum að þetta hafi gerst á þessum tíma en erum ekki með fyllri skýringar en aðrir,“ sagði Ólafur í samtali við fréttastofu Sýnar.

„Þetta er fyrst og fremst hryggilegt að upplifa umræðuna núna eins og hún birtst, það er augljóslega mikil reiði og mikil sorg hjá mörgum,“ bætti hann við.

„Við getum ekki farið fram á neitt“

Þann 2. september var hlutafélagið Fly Play Europe Holdco stofnað til að halda utan rekstur dótturfélags Play á Möltu í kjölfar skuldabréfaútgáfu þar sem Play var lagt til aukið fé. Ólafur segir aðkomu Birtu að því félagi þá sömu og hjá öðrum eigendum skuldabréfsins og að yfirmenn Birtu hafi litið á það sem ábyrgð að taka þátt í því útboði til að stuðla að því að hægt væri að klára yfirfærslu flugfélagsins til Möltu.

„Skuldabréfið var gefið út til að yfirfærslan, eins og henni var lýst á markaði, átti að leiða til þess að félagið yrði skalað niður og forðað frá því sem blasir við í dag. Það var okkar aðkoma að því máli eins og hjá öðrum kröfuhöfum sem keyptu.“

Þegar tilkynnt var að starfsemi Play yrði færð til Möltu segir Ólafur að ákvörðunin hafi verið tekin fyrir allra augum. Hann segir Lífeyrissjóðinn engar upplýsingar hafa fengið frá skiptastjóra um framhaldið.

„Við getum ekki farið fram á neitt, skiptastjórar ráða alfarið ferðinni núna og við munum fá upplýsingar frá þeim á hverjum tíma. Við ráðum engu frekar en þegar við vorum hluthafar og mættum á hluthafafundi og greiddum atkvæði í samráði við það.“

„Við vitum ekki hvort eitthvað óeðlilegt hafi átt sér stað og það er fyrst og fremst skiptastjóra að upplýsa um það. Ég hef enga ástæðu ti að ætla og hef engar upplýsingar um það að eitthvað óeðlilegt hafi átt sér stað,“ bætir Ólafur við.

„Vísvitandi gert því þetta var áhætta“

Hann segir að þegar Birta hafi lagt til aukið fé í Play hafi sjóðurinn einfaldlega verið að fylgja fjárfestingu sinni eftir. Alltaf hafi verið lögð áhersla á að gagnsæi ríkti um fjárfestingu sjóðsins.

„Önnur áhersla var að halda fjárfestingunni var að halda hlutfallinu sem lágu hlutfalli af heildareign vegna áhættunnar, uppsafnað 0,3% af eignum og það var vísvitandi gert því þetta var áhætta en við takmörkuðum áhættuna útaf því.“

Hann nefnir byggingu Hvalfjarðarganga í þessu samhengi sem Ólafur segir að hafi orðið til fyrir tilstuðlan lífeyrissjóða.

„Þeir komu að því frá upphafi og það leiddi til þess að hægt var að grafa göngin og nú nýtur þjóðin þess að göngin eru í eigu þjóðarinnar. Það þótti mjög mikil áhætta þegar það var gert en það gekk upp og stundum er það þannig þegar er tekin lítil áhætta hlutfallslega af heildareignum þá getur það verið samfélaginu til heilla en stundum þegar það gengur ekki þá þarf maður að mæta þeirri umræðu af ábyrgð.“