Ein­kunnir Ís­lands: Andri Lucas bestur í grát­legu tapi í París

Elías Rafn Ólafsson átti frábæran leik í markinu og hefur hirt stöðu aðalmarkvarðar með sinni frammistöðu í þessum glugga. Besti maður vallarins var hins vegar á hinum endanum, Andri Lucas Guðjohnsen. Á öðrum degi hefði hann skorað tvö mörk og tryggt Íslandi stig í París. 

Hér fyrir neðan má sjá einkunnir Vísis.

Elías Rafn Ólafsson, markvörður [9]

Varði oft á tíðum frábærlega í leiknum og kom vel útí teiginn þegar þess þurfti. Gat ekki komið í veg fyrir mörkin. Virtist líða vel á stóra sviðinu og átti stórkostlegan leik.

Guðlaugur Victor Pálsson, miðvörður [5]

Sat eftir og gerði Kylian Mbappé réttstæðan í öðru marki Frakklands. Hafði átt ágætis leik fram að því en líkt og aðrir varnarmenn Íslands átti hann í vandræðum með gríðarlegan hraða franska liðsins. Lenti ítrekað í vandræðum í seinni hálfleik þegar hann þurfti að stíga framar og eftir varð pláss fyrir aftan hann.

Sverrir Ingi Ingason, miðvörður [7]

Stýrði varnarlínunni af röggsemi. Kann vel við sig í svona leikjum. Kominn alltof hátt þegar Mbappé komst inn fyrir í öðru marki Frakka. Heilt yfir virkilega góður í dag.

Daníel Leó Grétarsson, miðvörður - tekinn af velli á 82. mín. [8]

Kunni vel við sig í þriggja manna vörn og var rétt staðsettur þegar þess þurfti. Virðist líða betur með hverjum leiknum sem hann spilar. Var tekinn af velli eftir að verða fyrir smávægis hnjaski. Án efa einn hans besti landsleikur engu að síður.

Mikael Anderson, hægri vængbakvörður - tekinn af velli á 64. mín. [6]

Hljóp gríðarlega eins og hann er vanur. Það sást þó bersýnilega að hann er ekki vanur að spila vængbakvörð og þá sást hvað best þegar hann braut einkar klaufalega á Marcus Thuram innan vítateigs í aðdraganda fyrra marks Frakka.

Mikael Egill Ellertsson, vinstri vængbakvörður [8]

Hélt vel í við Bradley Barcola. Þekkir stöðu vængbakvarðar og leysti hana með sóma. Gjörsamlega þindarlaus í dag og átti nóg eftir á bensíntanknum í lokin þegar aðrir voru þreyttir. Allar aðgerðir framkvæmdar af yfirvegun og gæðum. Átti þrumuskot í blálokin sem hefði á öðrum degi sungið í netinu.

Hákon Arnar Haraldsson (fyrirliði), miðjumaður [7]

Skagamennirnir á miðjunni hlupu fyrir allan peninginn. Sofnaði á verðinum í vítinu. Klikkaði vart á sendingu en komst lítið í stöðu til að skapa hættuleg færi.

Ísak Bergmann Jóhannesson, miðjumaður - tekinn af velli á 69. mín. [6]

Átti pressuna sem varð til þess að Michael Olise tapaði boltanum í markinu og var gríðarlega duglegur. Var hins vegar tæpur að gefa Frökkum mörkum með slakri sendingu í uppspili í síðari hálfleik. Fór svo illa með aukaspyrnu á hættulegum stað í byrjun seinni hálfleiks. Missti dampinn eftir góða byrjun, lenti í samstuði um miðbik fyrri hálfleiks og virtist vera í vandræðum eftir það.

Daníel Tristan Guðjohnsen, hægri kantmaður - tekinn af velli á 64. mín. [6]

Átti nokkur augnablik en var aðallega í því að halda stöðu og hægja á uppspili Frakklands. Skilaði sex af sjö sendingum sínum á samherja og vann helming einvíga sinna, sama hvort um var að ræða á grasinu eða í lofitnu.

Jón Dagur Þorsteinsson, vinstri kantmaður - tekinn af velli á 69. mín. [7]

Barðist og var til vandræða eins og hann er svo oft. Lítið í boltanum í fyrri hálfleik. Gríðarleg yfirferð, varðist allstaðar á vellinum. Fiskaði rauða spjaldið á Tchoucameni en fékk hökk á sköflunginn sem varð til þess að hann lauk leik.

Andri Lucas Guðjohnsen, framherji [9]

Kom Íslandi yfir eftir ótrúleg mistök í frönsku vörninni. Hélt boltanum vel ofarlega á vellinum og kom sér í góðar stöður. Hefði oft mátt reyna að ná skotinu sjálfur frekar en að leita af liðsfélögum. Vann vel aftarlega á vellinum. Skoraði jöfnunarmark undir lok leiks sem var dæmt af. Sýndi styrk sinn og gæði klárlega í kvöld.

Varamenn

Sævar Atli Magnússon kom inn fyrir Daníel Tristan Guðjohnsen á 64. mín. [5]

Lítið í boltanum en lét finna fyrir sér í pressunni. Sást annars lítið.

Bjarki Steinn Bjarkason kom inn fyrir Mikael Anderson á 64. mín. [5]

Átti fínar fyrirgjafir en náði ekki að setja mark sitt á leikinn.

Stefán Teitur Þórðarson kom inn fyrir Ísak Bergmann Jóhannesson á 69. mín. [4]

Skelfileg innkoma Skagamannsins. Réð engann veginn við leikinn og reyndi alltof mikið frekar en að spila einfalt.

Þórir Jóhann Helgason kom inn fyrir Jón Dag Þorsteinsson á 69. mín. [6]

Fín innkoma, gerði fátt rangt en fór lítið fyrir honum.

Kristian Hlynson kom inn fyrir Daníel Leó Grétarsson á 81. mín.

Spilaði of lítið til að fá einkunn.