„Þetta endar náttúru­lega á sak­lausu fólki“

Vinnslustöðin greindi frá lokun bolfiskvinnslunni Leo Seafood og uppsögn fimmtíu starfsmanna í dag. Í tilkynningu þess efnis á vef félagsins sagði að undanfarnar vikur hafi stjórn og stjórnendur Vinnslustöðvarinnar unnið að endurskoðun á rekstri fyrirtækisins í leit að hagræðingu.

„Það er ekki flókið, það er bara eins og er í fréttatilkynningunni, Það er búið að leggja á okkur það sem við reiknum út að séu um 850 milljóna króna veiðigjöld, sem við þurfum að bera. Þessar 850 milljónir eru miklir peningar í augum Vinnslustöðvarinnar og við þurfum að bregðast við. Það er augljóst mál að Vinnslustöðin sjálf er skuldsett sjálf eftir kaupin á Ós og Þórunni Sveinsdóttur og við þurfum að borga okkar skuldir. Það er það sem við þurfum að gera og við þurfum að bregðast við því með því að spara og okkar niðurstaða, þegar við erum búin að reikna út alla möguleika hérna í Vestmannaeyjum, er að sá möguleiki sem gefur okkur mesta sparnaðinn er að loka Leo Seafood,“ segir Brynjar í samtali við Vísi.

Langt í land

Sigurgeir segir að með hagræðingunni sparist um 350 til 500 milljónir króna sem sparist á ári. Sé miðað við 400 milljónir standi 450 milljónir króna eftir, sem þurfi að leita annars staðar.

„Við munum aldrei ná þessum 850 milljónum. Þetta er ekki flókið, þetta endar náttúrulega á fólki, saklausu fólki sem er búið að vinna hjá Leo Seafood í langan tíma og hjá fyrri eigendum þar. Harðduglegu og góðu fólki sem hefur lagt sig allt fram og þetta er hin sorglega niðurstaða.“

Stjórnendur geri sér sér grein fyrir því að eitthvað af milljónunum 850 muni lenda á Vinnslustöðinni en þeir muni auðvitað halda áfram að finna aðrar leiðir til hagræðingar.

„Þetta er auðvitað bara fyrsta og stærsta aðgerðin en ég held að ég geti sagt það að í kjölfarið verða engar svona fjöldauppsagnir. En við munum skoða hvern einasta krók og hvern og hvern einasta kima í félaginu og reyna og hagræða og spara og breyta rekstri. Þetta mun alltaf á endanum hafa áhrif á starfsfólk, þetta hefur áhrif á þjónustuaðila, þetta hefur áhrif á fjárfestingar og þetta hefur áhrif á getu félagsins til framtíðar. Þannig að þetta er á allan hátt vont fyrir félagið og fyrir samfélagið í Eyjum.“

Ætluðu sér að komast í gegnum skaflinn

Í fréttatilkynningu Vinnslustöðvarinnar sagði að rekstur Leo Seafood hafi verið þungur. Gríðarlegar hækkanir á launakostnaði og sterk króna hafi gert það að verkum. Sigurgeir segir að þegar félagið keypti Leo Seafood og Ós hafi það verið einlægur ásetningur stjórnenda að halda rekstrinum félaganna áfram. Þrátt fyrir erfitt rekstrarumhverfi hafi árangur náðst og stjórnendur og starfsfólk Leo Seafood staðið sig vel.

„Auðvitað vildum við komast í gegnum þennan skafl en þetta er hin sorglega niðurstaða. Við hefðum ætlað og ætluðum að halda áfram, bara svo það sé sagt.“

Kreppuástand fram undan víða á landsbyggðinni

Sigurgeir velkist ekki í neinum vafa um það að uppsagnirnar muni hafa mikil áhrif á samfélagið í Vestmannaeyjum. Hann þekki það vel sjálfur eftir að Vinnslustöðin, með hann í brúnni, sagði upp miklum fjölda starfsfólks vegna rekstrarörðugleika. Eftir uppsagnirnar hafi aðeins 150 manns verið í vinnu hjá félaginu.

„Fyrir þessar uppsagnir voru í vinnu hjá okkur 330 manns í Vestmannaeyjum. Ég þekkti afleiðingarnar af því þegar við sögðum upp, það var í mörg ár á eftir viðvarandi atvinnuleysi. Menn héldu ekki við húsunum sínum. Það var kreppa og kreppuástand hér í Vestmanneyjum. Það er auðvitað það sem mér finnst lang, langlíklegast að fari af stað víða á landsbyggðinni. Það er ekki bjartsýni og ekki kraftur sem fylgir aukinni skattlagningu, heldur þvert á móti. Nú þurfa menn að fara í vörnin, pakka í hana og gera það sem gera þarf. Sem er mjög óþægilegt fyrir samfélögin og fólkið í kring.“