Eze hafi nú þegar náð sam­komu­lagi við Tottenham

Eze hefur verið eftirsóttur biti á félagsskiptamarkaðnum undanfarin ár, en hann hefur hingað til haldið sig hjá Crystal Palace þar sem hann hefur leikið frá árinu 2020. 

Hann hefur verið orðaður við erkifjendurna í Tottenham og Arsenal í sumar og nú virðist Eze vera búinn að ákveða að velja Tottenham.

Fabrizio Romano greinir frá því að Eze hafi nú þegar sagt forráðamönnum Palace að hann vilji ganga í raðir Tottenham. Hann segir einnig frá því að Eze sé búinn að samþykkja að ganga í raðir félagsins.

Þó eiga félögin tvö, Tottenham og Crystal Palace, eftir að ná saman áður en félagsskiptin ganga í gegn.

Eze er 27 ára gamall sóknarsinnaður miðjumaður sem hefur leikið 146 leiki í ensku úrvalsdeildinni fyrir Crystal Palace og skorað í þeim 34 mörk. Þá á hann einnig að baki ellefu leiki og eitt mark fyrir enska landsliðið.