„Lé­leg blaða­mennska“ sem byggi á upp­hrópun­um og hatri á at­vinnu­lífi

Nýjasta tölublað Heimildarinnar, sem kom út föstudaginn 25. júlí, er tileinkað áhrifum ferðaþjónustu á Ísland og á forsíðunni er stór umfjöllun um Vík í Mýrdal sem ber fyrirsögnina „Ferðamannalandið Ísland: Sáu ferðamenn í fyrsta sinn sem plágu“

Ingibjörg Dögg Kjartansdóttir, ritstjóri Heimildarinnar, ræddi síðan um umfjöllunina á Bylgjunni í gær þar sem kom fram að rotþróin í Vík í Mýrdal réði ekki við ferðamannafjöldann og því lægi saurlykt yfir bænum.

Umfjöllunin hefur vakið töluverða athygli, ekki síst hjá fulltrúum ferðaþjónustunnar sem finnst að sér vegið. Bjarnheiður Hallsdóttir, framkvæmdastjóri ferðaskrifstofunnar Katla DMI og formaður Samtaka ferðaþjónustunnar frá 2018 til 2024, er manna óánægðust og gagnrýndi umfjöllunina harðlega í Facebook-færslu í dag.

„Veftímaritið Heimildin stundar nú stórfurðulega, einhliða og einstaklega rætna herferð gegn íslenskri ferðaþjónustu og fólkinu sem rekur ferðaþjónustufyrirtæki á Íslandi. Þessi atlaga að greininni getur ekki verið tilviljun ein og maður kemst ekki hjá því að velta því fyrir sér hver sé tilgangurinn, undan hvaða rótum hún er runnin og hvaða gagn hún á að gera,“ skrifar Bjarnheiður í færslunni.

Stuðlan samfélagslegrar sáttar sé ekki það sem reki starfsmenn Heimildarinnar áfram heldur „að etja ferðaþjónustunni og þjóðinni saman, ala á óvild og öfund, búa til tortryggni og það á einstaklega ósmekklegan hátt,“ skrifar hún einnig.

Öfgafull jaðartilfelli séu tekin fyrir

„Heimildin velur í umfjöllun sinni dæmi sem eru líkleg til að hreyfa við tilfinningum fólks og reita það til reiði og fjallar oftast um jaðartilfelli - öfgafull tilfelli sem eiga sjaldnast við,“ segir Bjarnheiður og nefnir sem dæmi að Vík í Mýrdal sé þungamiðja herferðar Heimildinnar gegn ferðaþjónustu.

„Þorp sem fyrir örfáum árum var deyjandi byggðarlag, en hefur náð vopnum sínum svo um munar eftir uppgang ferðaþjónustunnar. Skatttekjur Víkur í Mýrdal af ferðaþjónustu á árinu 2024 voru um það bil hálfur milljarður króna. Ég veit fyrir víst að mörg sveitarfélög myndu gjarnan vilja vera í sporum Víkur í Mýrdal,“ skrifar Bjarnheiður.

Heimildin kasti sér á að það sem er neikvætt og fái „aðfluttan íbúa til að kvarta yfir aðfluttum íbúum“ sem sé einstakleg pínlegt að mati Bjarnheiðar.

„Heimildin kallaði sömuleiðis fram hneykslan einhverra þegar hún fjallaði með miklum tilþrifum og myndbirtingum um að ferðamenn hefðu ruðst með látum inn í jarðarför í kirkjunni í Vík í Mýrdal. Það er vissulega ekki hægt að mæla því bót - en auðvitað tiltölulega einfalt að koma í veg fyrir, eins og gert er í kirkjum um allan heim, þegar þær eru lokaðar almennri umferð,“ skrifar Bjarnheiður.

Hún nefnir einnig umfjöllun um ferðamenn sem hafa verið til vandræða í Hallgrímskirkju sem birtist reyndar í kvöldfréttum Sýnar og síðan á Vísi.

„Þar var kirkjuhaldari dreginn upp á dekk og látinn segja frá ferðamönnum, sem ekki fara eftir fyrirmælum og troða sér jafnvel inn í útfarir. Þessi sama kirkja hefur um 300 milljónir í tekjur af ferðamönnum á ári og ætti að vera í lófa lagið að halda fólki í burtu, þegar það á við,“ skrifar Bjarnheiður.

„Léleg blaðamennska“ sem virðist byggja á „djúpstæðu hatri“ á atvinnulífinu

Bjarnheiður segir Heimildina hafa leitað fanga víða til að byggja undir vafasaman málflutning. 

„Hún nafgreinir meðal annars fólk sem hefur haslað sér völl í ferðaþjónustu til að gera það tortyggilegt, elur á hugmyndum um gróðastarfsemi sem þekkir engin mörk, launaþjófnaði, illa meðferð á starfsfólki (sérstaklega erlendu auðvitað) og kyrjar fleiri kunnugleg stef, sem ferðaþjónustan í heild þarf að sitja undir ár eftir ár,“ skrifar hún.

„Heimildin telur sig örugglega vera að stunda stórkostlega rannsóknarblaðamennsku þegar akkúrat hið gagnstæða á við. Léleg blaðamennska, byggð á upphrópunum, smellabeitum og að því er virðist djúpstæðu hatri á atvinnulífinu,“ skrifar hún að lokum.

Uppfært: Upphaflega stóð í fréttinni að Bjarnheiður væri núverandi formaður Samtaka ferðaþjónustunnar sem er ekki rétt. Pétur Óskarsson er það en hann tók við formennsku samtakanna í fyrra eftir sex ára formennsku Bjarnheiðar.