Neyðast til að endur­byggja grunn­skólann vegna myglu

„Það voru starfsmenn sem að fundu fyrir einkennum og þeir létu vita. Við gerðum strax ráðstafanir til þess að rannsaka þetta,“ segir Björn S. Lárusson, sveitarstjóri Langanesbyggðar í samtali við fréttastofu.

Alls voru tekin 66 sýni og sýndi þriðjungur þeirra fram á myglu. Þar á eftir voru framkvæmdar rakamælingar og reyndist myglan vera nokkuð útbreidd. Árið 2017 hafði verið farið í mótvægisaðgerðir eftir að mygla kom upp en reyndust þær ekki nægar til að koma í veg fyrir útbreiðsluna. Björn segir mygluna vera að mestu leiti í sökkli og plötu sem leiðir síðan upp í dúk. Dúkurinn er með lífrænu lími sem myglan nærist á.

Fyrsti hluti grunnskólans var byggður árið 1944 en viðbyggingum bætt við árin 1961, 1979 og 1996, samkvæmt fundargerð sveitarstjórnar Langanesbyggðar.

Gert er ráð fyrir að það taki tvö ár að leysa málið. Sveitarfélagið á húsnæði fyrir og tekur annað á leigu þar sem kennsla tæplega sextíu grunnskólabarna skólans fer fram um sinn.

Þrjár tillögur lagðar fram

Birni var falið að leggja fram tillögur á hvað skyldi gera.

„Ég lagði til í fyrsta lagi að það yrði farið í viðgerðir, í öðru lagi að við myndum rífa skólann og byggja nýjan á sama grunni og í þriðja lagi að byggja nýjan skóla á þessu skólasvæði, sem við köllum skólatorfan. Við létum reikna alla þessa kosti út og það var merkilega lítill munur. Lægsti kostnaðurinn var 690 milljónir sem var að gera við en það tryggir okkur ekki að við komum í veg fyrir þetta þannig að sú leið var sú sísta,“ segir hann.

„Sveitastjórn ákvað í ljósi þessa minnisblaðs sem ég lagði fyrir að kanna nánar að fara í þessa leið að byggja nýjan skóla á nýjum stað. Kostnaðurinn var mestur við það að rífa skólann og byggja aftur því þá þurfum við að rífa og byggja svo nýjan þar ofan á. Það væri betri að skilja skólinn eftir eins og hann er, byggja nýjan, og reyna svo að ráðstafa þessari byggingu, kannski fyrir einhverja aðra starfsemi eða rífa hana.“

Björn segir það hins vegar ekki liggja fyrir hvað yrði gert við gömlu bygginguna, skyldi sveitarstjórnin ákveða að byggja glænýja.

„Það liggur ekki fyrir, við hugsanlega seljum hann eða hvernig sem það er.“

Stígi varlega til jarðar

„Þetta er mikið áfall, sérstaklega fyrir kennsluna. Gríðarlegt áfall fyrir kennsluna. Svo númer tvö, þá kostar þetta okkur eitthvað á bilinu sjö til níu hundruð milljónir, fyrir lítið sveitarfélag, segir Björn.

Aðeins liggi fyrir bráðabirgðaútreikningur á því hvað hver lausn skyldi kosta. Hann segir sveitarfélagið samt sem áður vera með afar lágt skuldahlutfall upp á 67 prósent og hátt hlutfall sem veltufé frá rekstri. Því þyrfti einungis að taka lán fyrir um helming kostnaðarins.

„Nú erum við í þeim fasa að kafa nánar ofan í þetta. Það er alltaf þegar maður stendur frammi fyrir svona að það er mikil óvissa í útreikningunum. Ef við byggjum nýjan skóla erum við ekki að fara byggja nýtt minnismerki heldur við ætlum að gera þetta eins ódýrt og hægt er. Skólinn núna er barns síns tíma og upprunalega byggingin er orðin yfir áttatíu ára gömul.“

Það sé þó samt mikilvægt að gera nýja byggingu sem samræmist þörfum nútíma skólabarna.

„Við stígum varlega til jarðar, við hugsum málið mjög vandlega. Þó að mikið liggi við þá ætlum við að vanda okkur í þessu ferli. Sveitastjórnin er algjörlega sammála um það að skoða þessar leiðir tvær, það er að segja rífa og byggja aftur eða byggja nýjan, og vill þá helst byggja nýjan. Það var falið mér og skólastjóra og hönnuði sem vinnur hjá okkur að kafa í þessar leiðir.“