Slóðinn að gosinu einungis fyrir viðbragðsaðila og jeppa Icelandia

Mikill fjöldi fólks leggur leið sína upp að gosstöðvunum þessa dagana. Í gær mættu nærri fjögur þúsund manns til að berja eldgosið augum. Þægilegasta leiðin að gosinu er sú að leggja á sama bílastæði og við eldgosið í Fagradalsfjalli árið 2021, sem er á gjaldsvæði P1, og ganga síðan slóða í eigu landeigenda á svæðinu að gosinu. Slóðinn er rúmlega þrír kílómetrar að lengd. 

Ganga og aka einbreiðan veg

Sigurður Guðjón Gíslason formaður Landeigendafélagsins Hrauns segir í samtali við fréttastofu að litlu hefði mátt muna að bílastæðið fylltist í gær. 

Eigendur slóðans hafa gert samning við ferðaþjónustufyrirtækið Icelandia sem felur í sér að ferðamönnum er ekið með jeppum fyrirtækisins alveg upp að gosstöðvunum og til baka. 

„Það vilja allir komast inn á þennan slóða sem Icelandia er að keyra. Og vilja bara almennt komast nær þessu. Svo er nóg að gera á bílastæðinu sem verður til þess að við þurfum að uppfæra merkingar. Það er alltaf eitthvað nýtt,“ segir Sigurður í samtali við fréttastofu. 

Umferð eftir slóðanum sé þung, eftir honum aki jeppar Icelandia og viðbragðsaðilar meðan fjöldi vegfarenda gangi slóðann. Landeigendurnir hafi því brugðið á það ráð að koma upp rafmagnshliði til að stýra aðgangi að stöðvunum.

„Ekki hugsaður fyrir gangandi umferð“

Einungis bílum Icelandia og viðbragðsaðilum er heimilaður aðgangur um slóðann. Fréttamenn og ljósmyndarar eru ekki meðal þeirra sem fá aðgang að slóðanum endurgjaldslaust en Sigurður heldur því til haga að hingað til hafi enginn greitt fyrir að aka hann. 

Eftir að rafmagnshliðinu verður komið upp verði möguleiki á að semja við aðra aðila í tengslum við sérhæfð verkefni, til að mynda kvikmyndaverkefni, um að fá aðgang að veginum en þó gegn umsýslugjaldi. Samkvæmt heimildum fréttastofu kosta afnot af slóðanum í eitt skipti allt að 20 þúsund krónur. 

Sigurður segir meginmarkmiðið með samstarfinu með Icelandia sé að gefa fólki sem getur ekki gengið að stöðvunum tækifæri til að sjá eldgosið.

„Þessi slóði var náttúrlega ekki hugsaður fyrir gangandi umferð. Þegar byrjaði að gjósa í Fagradalsfjalli á sínum tíma var þetta okkar tillaga að keyrsluleið upp fjallið,“ segir Sigurður. Sú tillaga hafi raungerst í núverandi gosi, það sé heppilega staðsett.

„Þannig að þetta er svolítið vand með farið á einbreiðum vegi,“ segir Sigurður. Þrátt fyrir skilti og merkingar hafi vegfarendur undanfarna daga ekið slóðann sem nú er einungis ætlaður bílum á vegum Icelandia. Þess vegna sé mikilvægt að koma upp rafmagnshliði.

Eigendurnir séu í stöðugu samtali við lögreglu og viðbragðsaðila um hversu mikla umferð vegurinn ræður við svo hann teljist öruggur. 

„Fyrst og síðast þurfa viðbragðsaðilar að treysta sér til að vera með gott viðbragð þarna uppi eftir. Það er mjög erfitt ef það eru þrír, fjórir bílar að keyra á móti þeim í hvert skipi sem þeir eru að fara upp eftir,“ útskýrir Sigurður. 

Fréttin hefur verið uppfærð.