Xhaka of mikil­vægur til að selja til Sunderland

Umboðsmaður Xhaka hefur staðfest að samkomulag sé í höfn milli hans og félagsins, aðeins eftir eigi að ganga frá kaupverðinu við Bayer Leverkusen.

Ekkert verður hins vegar af félagaskiptunum ef marka má orð Ten Hag í viðtali við Bild:

„Umboðsmaðurinn hans má segja það sem hann vill, en félagið hefur nú þegar misst þrjá mikilvæga leikmenn [Florian Wirtz, Jeremie Frimpong og Jonathan Tah] og við munum ekki leyfa fleirum að fara. Granit er leiðtogi og á þrjú ár eftir af samningi sínum.

Ég ætla að vera mjög skýr - Granit er lykilleikmaður, hann skrifaði undir fimm ára samning og á þrjú ár eftir. Hann er of mikilvægur fyrir okkur til að missa hann.“

Yfirmaður íþróttamála hjá félaginu, Simon Rolfes, tók undir orð Ten Hag og sagði Xhaka mikilvægan en sagði einnig að félagaskipti væru möguleg.

Xhaka hefur spilað 99 leiki fyrir Leverkusen síðan hann kom til liðsins frá Arsenal árið 2023 og átti stóran þátt í tvennutímabilinu 2023-24.

Árangurinn var ekki sá sami á þessu tímabili og lykilleikmenn eru farnir frá félaginu. Ten Hag tók við þjálfarastarfinu af Xabi Alonso, sem er orðinn þjálfari Real Madrid.